ادام نەگە قۋانىشتان جىلايدى
نۇر- سۇلتان. قازاقپارات - جىلاۋ - تىرشىلىك يەسىنە ءتان قاسيەت. ادام كوپ جاعدايدا قورقىنىشتان نەمەسە ءبىر جەرى اۋىرعاننان، قايعىرعاننان جىلايدى. ول - زاڭدىلىق. قاتتى قورىققاندا ءوزىڭىزدى جالعىز سەزىنەسىز نە ەموتسياڭىزدى ىشتە ساقتاي المايسىز.
بۇل ىشكى جان دۇنيەنىڭ كۇيزەلىسىنە الىپ كەلەدى. سوندا جىلاۋعا ەرىك بەرەسىز. ءدال سول سەكىلدى دەنەڭىز اۋىرسىنعان كەزدە جانىڭىزعا باتقان سايىن ىشكى شىدامدىلىقتى سىرتقا شىعارۋ ءۇشىن جىلايسىز. ال جانارعا جاس تولىپ، تامشى بوپ اعۋى ادامعا ءتان قاسيەتتىڭ ءبىر ءتۇرى،
دەپ جازادى «ماسساگەت. ك ز».
ەڭ قىزىعى ادام تەك مۇڭايىپ نە قورىققان كەزدە عانا ەمەس قۋانىشتان دا جىلايدى. جاس ادامدار كوبىنەسە مۇنى السىزدىك بەلگىسى رەتىندە قابىلدايدى. ياعني سىزگە جامان بولعان كەزدە عانا جىلاۋىڭىز مۇمكىن دەگەن تۇسىنىك قالىپتاسقان. ءبىراق ءبىز قۋانىشتان دا جىلايمىز.
عالىمدار نە دەيدى؟
ا ق ش ۋنيۆەرسيتەتىنىڭ عالىمدارى ادامنىڭ قۋانىشتان جىلايتىن ساتىنە بايلانىستى زەرتتەۋ جۇرگىزگەن. ولار سوعىستان كەلگەن جىگىتىن نە كۇيەۋىن كۇتىپ العان قىز- كەلىنشەكتەردىڭ ەموتسياسىنا ساراپتاما جاساعان. ناتيجەسىندە ادامدار قۋانىش كەزىندە مۇڭايۋعا قاراعاندا شىنايى ءارى دەمدە جىلاعان. ولار وتە قۋانعان كەزدە ەموتسياسىن ۇستاي الماي، بىردەن سىرتقا شىعارعان. بۇل جاعداي ۋنيۆەرسيتەت ءبىتىرىپ جاتقان بالاسىن كورگەن اتا- انالاردىڭ بويىنان بايقالعان. ولار بۇل قۇبىلىستى ادام قاتتى قوبالجىعان كەزدە ىشكى ەموتسياسىنا يە بولا الماۋدان پايدا بولادى دەپ ءتۇيدى. دالەل رەتىندە عالىمدار قاتتى كۇلكىنىڭ، شىنايى كۇلكىنىڭ ءوزى جىلاۋعا الىپ كەلەتىنىن بىلاي تۇسىندىرەدى: ەزۋ كەيىن قاراي شەكتەن تىس جىلجىعاندا جۇيكە تالشىقتارىنىڭ ويانۋىنان جاس بولىنەدى.
«قۋانىشتان جىلاۋ - ميف» دەيدى...
عالىمداردىڭ ويىنا ءبىرقاتار پسيحولوگ قارسى شىقتى. سەبەبى ولاردىڭ ويىنشا قۋانىشتان جىلاۋ دەگەن تۇسىنىك جوق. ول تەك ادامنىڭ جاعىمسىز ەنەرگيادان ارىلۋى عانا دەپ تۇسىندىرەدى. ونىڭ ءبارى ادامنىڭ ءوز قالاۋىندا دەپ قاراستىرادى. ادامنىڭ جاسى ەشقاشان بىتپەيدى. ول ونى كەز كەلگەن جەردە شىعارا الادى جانە توقتاتا الادى. بۇل قالىپتى جاعداي. عالىمدار مەن پسيحولوگ مامانداردىڭ داۋىنان مىناداي تۇجىرىم شىعارۋعا بولادى. قۋانىشتان جىلاۋ قالىپتى جاعداي، ول جان دۇنيەنىڭ ەموتسياسىن ساقتاي الماۋدان تۋاتىن شىنايى ءارى تابيعي قۇبىلىس. قازاق حالقىندا «قۋانعان مەن قورىققان بىردەي» دەگەن ءسوز بار. شىنايى ءارى شاتتىقتان شىققان جاستىڭ ءدامى مۇڭنان تۋاتىن جاستىڭ دامىنە قاراعاندا ءتاتتى بولارى انىق. بۇل قۇبىلىستى اركىم ءارتۇرلى قابىلدايدى.
