چەحياداعى زاۋىت پەن فابريكالاردا مامان تاپشى

زاۋىت پەن فابريكالارعا بىلىكتى ماماندار جەتىسپەي ءجۇر. جەرگىلىكتى كومپانيا ديرەكتورلارىنىڭ 70 پروتسەنتىنەن استامى مۇنى ءوز جۇمىسىنداعى باستى قيىندىق رەتىندە سانايدى. ماماندار تاپشىلىعىنا ميگرانتتاردىڭ ءوز ەلدەرىنە كەتۋى سەبەپ بولعان.

چەحيانىڭ ەڭ ءىرى الەۋمەتتانۋشى كومپانياسى جۇرگىزگەن ساۋالناماعا وتاندىق جانە ەۋروپالىق نارىقتا بەدەلى زور 125 كومپانيا قاتىستى. ولاردىڭ تەك 18 ءى عانا بولاشاعىن ۋايىمدامايتىنىن جەتكىزدى. قالعاندارى قينالىپ جاتقانىن مويىندادى.

ميكاەل بالانوۆيچ، قۇرىلىس كومپانيانىڭ ديرەكتورى:

- 2019 -جىلى زاۋىتىمدا ىستەگەن 500 جۇمىسشىنىڭ 384- ءى شەتەلدىك بولعان. ۋكراينا، مولدوۆا، رۋمىنيا ازاماتتارى. بۇگىندە نەبارى 104 ادام جۇمىس ىستەپ جاتىر. ءونىم ءوندىرۋ كولەمى بەس ەسە ازايدى. جۇرت بىزگە كەلگىسى كەلەدى، ءبىراق سانيتارلىق شەكتەۋلەردەن قورقادى.

ەڭبەك ميگراتسياسىنا قاتىستى تۋىنداعان داعدارىس چەحيادا ەكى جىل جالعاسىپ كەلەدى. پاندەميانىڭ كەسىرىنەن جۇمىسسىزدىق كوبەيگەنىمەن، جەرگىلىكتى تۇرعىندار اۋىر جۇمىسقا ورنالاسقىسى كەلمەيدى. سونداي- اق قۋات كوزدەرىنىڭ قىمباتتاۋى دا جاعدايدى ودان ءارى ۋشىقتىردى. كاسىپكەرلەردىڭ ءبىرازى شيكىزات پەن ماتەريالداردىڭ قىمباتتاۋىنا دايىن بولماي شىققان.

يۋري كولتوۆيچ، چەحيا پارلامەنتى تومەنگى پالاتاسىنىڭ دەپۋتاتى:

- باعالار شىلدە ايىندا وسە باستادى. سوندىقتان بۇل كاسىپكەرلەر ءۇشىن توسىن جاڭالىق دەۋگە بولمايدى. قۇرىلىس ماتەريالدارى راسىندا دا ونداعان، ءتىپتى جۇزدەگەن پروتسەنتكە قىمباتتادى. اعاش، پلاستماس پەن مەتالل باعاسى وسكەن. كۇزدە ءتىپتى تاپشىلىعى دا بايقالدى.

الايدا بۇل تەك چەحيا ەمەس، كوپتەگەن ەلدە بولعان ماسەلە. شەكارالار جابىلعاندىقتان، تاۋار جەتكىزۋدە كىدىرىس بولعان. قازىر ءوندىرىس، نارىق پەن كاسىپ جۇرگىزۋ ادىستەرى تۇپكىلىكتى وزگەرىپ كەلەدى. ۇكىمەت قولىنان كەلگەنشە قولداۋ كورسەتىپ جاتىر. ءبىراق بيزنەسمەندەردىڭ وزدەرى دە قيىندىقتارعا ۇنەمى دايىن بولۋى كەرەك. مامان تاپشىلىعىنان قۇرىلىس سالاسى كوپ زارداپ شەكتى. وسىنىڭ كەسىرىنەن باسپانا باعاسى % 20 قىمباتتاپ، ءبىر شارشى مەترى ءۇش جارىم مىڭ دوللارعا جەتتى. جەلتوقسان ايىندا 2 قۇرىلىس كومپانياسى كۇيرەسە، جىلدىڭ باسىنان بەرى 13 فيرما جابىلعان.