ءوزىڭ وزگەرسەڭ - ءومىر دە وزگەرەدى

بۇل تۋرالى كوپ نارسە ايتۋعا بولار ەدى. توقەتەرىن عانا ايتايىق - شىن ءلاززات الاتىن ىسپەن عانا شۇعىلدان. سوندا باقىتىڭ شىنايى بولماق. ينتەرنەت دامىعالى ءبارى وڭتايلاندى ەمەس پە؟ جاساعان ءار ءىسىڭدى ەلگە ايتۋعا مۇمكىندىك ەسەلەندى. سەنىڭ شابىتپەن ىستەگەن ءار زاتىڭا باعا بەرۋشى تابىلادى. جانىپ تۇسەتىن ءىسىڭ بولسا، بۇل سەنىڭ وزگەگە ۇناۋىڭنىڭ كىلتى بولماق. ءوز جولىڭدى تابۋىڭ - بۇل مارافون، ول جىلدار بويى جالعاسا بەرۋى ىقتيمال.

2. جەيتىن، ىشەتىن، شەگەتىن قوقىستان ءوز ەركىڭمەن ارىل. ەشقانداي قۇپيا جوق. تەك ەسى دۇرىس تاماق ىشۋگە كوش. جەمىس- جيدەك، كوكونىس، سۋ. ەتتەن باس تارتىپ، مۇلدە كوك شوپكە اۋىپ كەتپە. شەكتە. قانتتى، ۇندى، كوفەنى، ىشىمدىكتى. سوسىن بارلىق پلاستماسس تاماقتان باس تارت. بولدى.

3. شەت ءتىلىن ۇيرەنۋ قاجەت. الەمدى تانۋدا كەرەمەت كوكجيەكتەردى اشادى. وقۋ، جەتىلۋ ءۇشىن، جۇمىستا جەتىستىككە جەتۋدە ارمانداماعان بەلەستەرگە شىعارادى. ءورىستىلدى ينتەرنەت قولدانۋشىلار ارى كەتسە 60 ميلليون. اعىلشىنتىلدىلەر - ميلليارد. پروگرەسستىڭ كىندىگى ءقازىر شەكارانىڭ ارعى بەتىندە. تىلدىك شەكتىڭ دە ار جاعىندا. اعىلشىن ءتىلىن ءبىلۋ - زيالى قاۋىمنىڭ ماقتانىشى ەمەس، كۇندەلىكتى قاجەتتىلىك.

4. كىتاپ وقى. ءوزىڭنىڭ كاسىبىڭە بايلانىستى قىزىقتىراتىن ادەبيەتتى مەڭگەر. وعان قوسا تاريح، كوركەم ادەبيەت، پسيحولوگيا، جاراتىلىستانۋ، ءومىرباياندىق حيكايالاردى كوپ وقى. وقۋعا ۋاقىت جوق دەسەڭ اۋديوسىن تىڭدا. اپتاسىنا ءبىر كىتاپ. سوندا جىلىنا 50 كىتاپ. سونىڭ ءبارى ءومىردى وزگەرتۋگە كىرپىش بولىپ قالانادى.

5. دەمالىس كۇندەرىڭدى ماعىنالى ەتىپ وتكىز. مۇراجايعا، كورمەگە بار. سپورتپەن شۇعىلدان. قالانىڭ سىرتىنا شىق. پاراشيۋتپەن سەكىر. تۋىستارىڭا قىدىر. تىم بولماعاندا ءتاۋىر فيلم كور. الەممەن قاتىناس شەگىن كەڭەيت. ءبارىن كورىپ، بارلىق جەرگە بارىپ كەلگەن سوڭ دوستارىڭمەن كەزدەسىپ، كورگەن- بىلگەنىڭدى ورتاعا سال. بار گاپ - ءبىر ورىندا وتىرماۋ. كورگەنىڭنىڭ ءبارىن جۇرەكتەن وتكتىزسەڭ، ءاربىر بەيماعلۇم قۇبىلىس پەن بەيمالىم ۇعىمداردى تۇسىنە باستايسىڭ.

6. كۇندەلىك جاز. نەمەسە قازىر بلوگ جازۋ ءسان. سەندە جاز. نە تۋرالى ەكەنى ماڭىزدى ەمەس. ون وقىرمانىڭ بولسا دا، كوسىلىپ جازۋ قولىڭنان كەلمەسە دە، جازا بەر. ساعان كەرەگى ءوز پاراقشاڭدا ويىڭدى ءبىلدىرۋ. ويلاي بىلەتىنىڭدى كورسەتەسىڭ. ءوزىڭ جاقسى كورەتىن نارسە تۋرالى ۇنەمى جازاتىن بولساڭ، تۇراقتى وقىرمانىڭ پايدا بولادى.

7. ماقسات قوي. قاعازعا جاز. بولماسا كۇندەلىككە. بلوگقا. ناقتى، انىق، تۇسىنىكتى، ولشەۋلى بولسىن. ماقسات تاپساڭ، وعان جەتۋ- جەتپەۋ مۇمكىن بە دەگەندى بىلەسىڭ. ماقساتىڭ بولماسا، وندا جەتىستىك تە كەلمەيدى.

8. پەرنەتاقتادا كوزدى جۇمىپ باسۋدى ۇيرەن. 21- عاسىردا مۇنى بىلمەۋ ۇيات ەندى. ۋاقىت - ادام قولىنداعى ەڭ ۇلى قازىنا. تەز ويلاعانداي تەز تەرە ءبىلۋدى يگەرۋىڭ كەرەك. كەرەك ءارىپ قايدا دەگەندى ويلاما. نە جازاتىنىڭدى ويلا.

9. ۋاقىتتى اۋىزدىقتا. جۇمىسىڭدى سەنسىز جاسالاتىنداي ۇيىمداستىرا ءبىل. ەڭ الدىمەن اللەندى وقى. گلەب ارحانگەلسكييدى. شەشىمدى جىلدام قابىلدا. تەز ارەكەت قىل. ەشتەڭەنى ەرتەڭگە قالدىرما. ءىستىڭ ءبارىن تىندىر. نەمەسە وزگەگە جۇكتە. ەشقاشان دوپ سەن جاقتا ۇزاق قالماۋىن قاداعالا. ءالى كۇنگە دەيىن بىتپەگەن، مازاڭدى الىپ تۇرعان ۇزاق مەرزىمدى ءىستىڭ ءبارىن قاعازعا ءتىز. شىنىمەن ماڭىزى بار- جوعىن باعامدا. قالعان ءىستى تەز ءبىتىر. كەرەك ەمەسىن ءوشىر. جەڭىلدىك جانىڭا جاي تاپتىرادى.

10. كومپيۋتەرلىك ويىننان باس تارت. سول سياقتى الەۋمەتتىك جەلىدە، ماقساتسىز ءبىر نارسەمەن شۇعىلدانۋدى دوعار. ينتەرنەتتى كەزە بەرمە. كەرەك جەردە عانا بول. پوشتاڭدى عانا تەكسەر. نەمەسە تەلەفونىڭا حات كەلدى دەيتىن حابارلامانى ورناتىپ ال. ۋاقىتىڭدى قادىرلە.

11. جاڭالىق وقۋدى قىسقارت. ءماندى نارسەنى اينالاڭنىڭ ءبارى ايتىپ جەتكىزەدى. باسقاسى سەن ءۇشىن ماڭىزدى ەمەستىگىن تەز تۇسىنەسىڭ.

12. ەرتە تۇرىپ داعدىلان. تاڭعى ۋاقىتتا ادام كوپ نارسەگە ۇلگەرەدى. كەشكە تامان شارشايدى. ەگەر ەرتە تۇرىپ الماتىدان تاڭعى 06-00 شىقساڭ 12-00 بالقاشتا بولاسىڭ. وداندا ەرتە بارۋعا بولادى. دۇكەن ارالاۋ كوپ ۋاقىتتى جەيدى. ادامعا كۇنىنە 7 ساعات ۇيقى جەتكىلىكتى. جاقسى تاماقتانۋ مەن دەنە جاتتىعۋى قالىپتى بولسا، ادام تەز تىنىعادى.

13. جانىڭدا اشىق، تاربيەلى، اقىلدى، جەتىستىككە جەتكەن ادامدار كوپ بولسىن. ءبىز دەگەن ول ءبىزدىڭ اينالامىز. اينالامىزدان ءبارىن ۇيرەنەمىز. ءوزىڭ سىيلايتىن ادامدارمەن كوپ ۋاقىت وتكىز. ولاردان الارىڭدى الىپ قال. مۇنداي ادامدار قاتارىنا باسشىلىق جاتسا، نۇر ۇستىنە نۇر. كەرىتارتپا، شارشاڭقى، توزىپ جۇرگەن ادامدارمەن بايلانىستى ازايت. جاقسى بولۋ ءۇشىن ادام جوعارى قاراي ءبىلۋى كەرەك. ءوزىڭ دەڭگەيىنە جەتكىڭ كەلەتىن ادامدارمەن جاقىن ارالاس.

14. ءار ءساتتى، ءار ادامدى جاڭا نارسە ءبىلۋ ءۇشىن پايدالان. كەز كەلگەن سالانىڭ مايىن ىشكەن مايتالمانمەن جولىعۋدىڭ ءساتى تۇسسە، ونىڭ جۇمىسىنىڭ ءمانى نەدە، ونىڭ ماقساتى نە، قانداي جەتەلەۋىش ويعا باسىمدىق بەرەتىنىن بىلۋگە تىرىس. دۇرىس سۇراق قويۋدى ۇيرەن. ءتىپتى تاكسيشى دە باعالى اقپارات ايتۋى مۇمكىن.

15. ساياحاتتا. اقشام جوق دەپ سەبەپ ىزدەمە. دەمالىستىڭ قىزىعى ونىڭ ساپاسىنا بايلانىستى ەمەس. ارزان جەرلەرگە بارىپ تا كوپ قىزىققا باتۋعا بولادى. ساياحاتتىڭ ءبىر جاقسىسى ويلاۋ كوكجيەگىن كەڭەيتەدى. الەمنىڭ قانداي كەڭ ەكەنىن كورىپ، ەسىڭنەن تاناسىڭ. ءبىر ۇيدەن كىرىپ، ءبىر ۇيدەن شىعىپ، ەشتەڭەنىڭ قادىرىنە جەتە الماعانىڭدى تۇسىنەسىڭ. الدەقايدا سابىرلى، كورەگەن، ءتوزىمدى بولا باستايسىڭ.

16. فوتواپپارات ساتىپ ال. ءومىردىڭ قىزىقتى، سۇلۋ ساتتەرىن ءتۇسىرۋدى ادەت قىل. ءتۇسىرىپ ۇيرەنگەندە ساياحاتتارىڭنان كەرەمەت ەستەلىكتەر اكەلەسىڭ. سۋرەت سالۋعا دا بولادى. ءان سالۋعا. بيلەۋگە. ەرمەكسازبەن ءمۇسىن جاساۋعا. جوبالاۋمەن شۇعىلدانۋعا. ومىرگە وزگەشە قاراۋعا ۇيرەتەتىن نارسەمەن اينالىس.

17. سپورتپەن شۇعىلدان. كىلەڭ سپورتسمەندەر، بۇلشىقەتى بىلەۋدەي ەركەكتەر مەن جاسى كەلگەن اپالار جۇرەتىن فيتنەس كلۋبقا بارماسا دا بولادى. يوگا، تاۋعا شىعۋ، ۆەلوسيپەد، تۋرنيك، فۋتبول، جۇگىرۋ، ءجۇزۋ سياقتى قاراپايىم نارسەلەر بار. ادامنىڭ ەڭ جاقىن دوستارى وسىلار. ءوز تانىڭە لايىقتى قۇرمەت كورسەتۋدى ۇمىتپا. ليفت دەگەندى ۇمىت. تەك جاياۋ ءجۇر. ون قاباتتى ۇيگە جاياۋ ءمىنىپ، تۇسكەن ادام كۇنى بويى سەرگەك جۇرەدى. ءوزىڭدى وزگەرتۋگە قۇلشىنساڭ، وسىدان باستا.

18. وزگەشە نارسەلەردى جاسا. ەشقاشان بارىپ كورمەگەن جەرگە بار. جۇمىسقا باسقا جولمەن شىق. ءوزىڭ تۇك تۇسىنبەگەن نارسەنىڭ بايىبىنا جەتۋگە بارىڭدى سال. «جايلىلىق شەگىنەن» شىق. ومىرگە دەگەن كوزقاراسىڭدى وزگەرت. ۇيدەگى جيھازدىڭ ورنىن الماستىر. جىلىنا ءبىر رەت ىستەسە قاتىپ كەتەدى. سىرتقى الپەتىڭدى وزگەرت. شاشىڭدى قي، قىسقا كيىپ كور. الدە كەرىسىنشە. وزگەر.

19. سالىم سال. ەسى دۇرىس ادام ايىنا تابىسىنىڭ ءبىر بولىگىن سالىمعا جۇمسايدى. باي ادام دەگەن تابىسى كوپ ادام ەمەس. ۇنەمشىل ادام. سالىمى كوپ ادام دەسەكتە بولادى. قارجىلىق ماقسات قويىپ، وعان قول جەتكىزسەڭ، اقشانى ەسەپتەۋدى ۇيرەنەسىڭ. ۇنەمدەۋ وڭاي ەكەنىن بىلەسىڭ.

20. ەسكى- قۇسقىدان تەز قۇتىل. ءبىر جىلدان بەرى كيمەگەن ەسكى كيىمدەردى لاقتىر. بىرەۋگە بەر. شىنىمەن ۇنايتىن، كيەتىن كيىمدەردى عانا قالدىر. جاڭا زات العاندا، ەسكىسىن تاستاپ وتىر. زاتىڭ از بولعان سايىن شاڭ دا از، باس تا اۋىرمايدى.

21. العانىڭنان بەرەرىڭ باسىم بولسىن. بىلگەنىڭمەن، تاجىريبەڭمەن، ويلارىڭمەن ءبولىس. تەك الا بەرمەي، بولىسە جۇرەتىن ادام وزىنە تەك جاقسىلىق تارتىپ تۇرادى. ءوزىڭ دە ءالى كۇنگە دەيىن بىلمەگەن ءبىر نارسە ۇيرەنگىڭ كەلەتىن شىعار؟!

22. ءومىردى قالاي كورسەڭ، سول كۇيى قابىلدا. وزگەنى مىنەۋدەن تىيىل، نە نارسەگە دە نەيترالدى قارا. قولىڭنان كەلىپ جاتسا، ءپوزيتيۆتى باعالا.

23. وتكەن شاقتا بولعان دۇنيەنىڭ ءبارىن ۇمىت. سەنىڭ كەلەشەگىڭە ونىڭ ەش قاتىسى جوق. وتكەن شاقتان تاجىريبە، ءبىلىم، ساباق قانا الىپ كەتە الاسىڭ. جاقسى قارىم- قاتىناس پەن جاعىمدى ەستەلىكتەر عانا قالسىن.

24. قورىقپا. ادام المايتىن اسۋ جوق. كۇدىكتىڭ ءبارى سانادا عانا بار. سارباز بولۋ شارت ەمەس. تەك ماقساتتى كورسەڭ بولعانى. كەدەرگىنىڭ ءبارىن اتتاپ، اينالىپ وتەسىڭ. قايتسەڭ دە دەگەنىڭە جەتەتىنىڭە سەن. جەڭىلۋىم مۇمكىن دەگەن كۇمان مۇلدە بولماسىن.

25. سوڭعى ءسوز ءبىرىنشى سوزدە ايتىلعان. ۇناتقانىڭدى عانا جاسا. وقى. وقىت. دامى. ىشتەي ءوس، وزگەر.

بۇل ءتىزىمدى ۇزبەي جالعاستىرا بەرۋگە بولادى. وسىندا تىزىلگەننىڭ ءبىر- ەكەۋىن تاڭداپ الىپ، سونى جۇزەگە اسىرساڭ، سونىڭ ءوزى جەتىستىك. سوندا ايناعا قاراۋعا ۇيالمايتىن كۇيگە جەتەسىڭ. ءوزىڭدى بىلە تۇسەسىڭ. ال، الەم ساعان تامسانا قارايتىن بولادى. سەن سياقتى بولۋعا تىرىسادى.

اۋدارعان شىنار ءابىلدا