قىستا اۋىر جۇمىس ىستەۋ جۇرەككە زيان
نۇر-سۇلتان.قازاقپارات - دالادا كۇن سۋىقتا اۋىر جۇمىس ىستەۋ جۇرەككە زيان. اسىرەسە، قان قىسىمىن كوتەرىپ، ارتەريالدى قان تامىرلارىن تارىلتىپ جىبەرۋى مۇمكىن. بۇدان ادام ءولىپ كەتۋى دە ىقتيمال.
وسىلاي دەپ ەسكەرتەدى امەريكا كارديولوگيا قاۋىمداستىعى (AHA) .
قىستا قار كۇرەۋ مەن مۇز ويۋ اۋىر جۇمىس سانالادى. ويتكەنى بۇعان كوپ ەنەرگيا مەن كۇش- قۋات كەتەدى. ونىڭ ۇستىنە، سۋىق اۋا- رايى دا جاعدايدى ۋشىقتىرۋى مۇمكىن. كۇن سۋىقتا ءجۇرىپ ادام قان قىسىمىنىڭ كوتەرىلگەنىن سەزبەي قالاتىن كورىنەدى. ءارى ايازدان قان تامىرى تارىلىپ، قان قىسىمىن ودان ءارى ۋشىقتىرۋى ىقتيمال.
«سۋىقتا ءجۇرىپ قار كۇرەگەن ەر ادامداردىڭ جۇرەك سوعىسى مەن قان قىسىمىن ولشەگەندە، بۇل كورسەتكىشتىڭ قيمىل- قوزعالىسى از ادامنىڭ اتىپ تۇرىپ بەلسەندى اەروبيكامەن اينالىسىپ كەتكەندەگى جۇرەك سوعىسىمەن بىردەي ەكەنىن اڭعاردىق»، - دەيدى قاۋىمداستىق تاراپىنان جۇرگىزىلگەن زەرتتەۋ جۇمىسىنىڭ جەتەكشى اۆتورى، پروفەسسور بارري فرانكلين.
ونىڭ ايتۋىنشا، ا ق ش- تا جىل سايىن قار كۇرەپ، مۇز ويۋدان جۇزدەگەن ادامنىڭ جۇرەگى اسقىنىپ قايتىس بولادى.
«اسىرەسە، جۇرەگى اۋىراتىن ادامنىڭ قار كۇرەمەگەنى دۇرىس. از قوزعالاتىن، سەمىزدىگى بار، ديابەتكە شالدىققان ادامدارعا دا قارۋ كۇرەۋگە بولمايدى. جۇرەك تالماسى مەن ينسۋلت العاندارعا مۇلدەم»، - دەيدى فرانكلين.
ساراپشىلاردىڭ ايتۋىنشا، قاردى اسىقپاي، دەمالىپ كۇرەگەن ءجون. ءارى قاردى لاقتىرعاننان گورى كۇرەگەن، يتەرگەن الدەقايدا جەڭىل بولماق.
ەگەر جۇرەك پەن كەۋدە تۇسىنان اۋىرسىنۋ بايقاساڭىز، شارۋانى تەز دوعارۋ كەرەك. باس اينالۋ مەن تىنىس تارىلۋ دا - جۇرەك اۋرۋىنىڭ بەلگىسى. ال قاتتى اۋىرسا نە اۋىرۋ 10 مينۋت بويى كەتپەسە، بىردەن جەدەل جاردەمگە حابارلاسىڭىز.
جۇرەك اۋرۋىن ەلەمەۋ - قاتەلىك. جۇرەك اۋرۋىنا شالدىقپاۋدىڭ امالى - دۇرىس تاماقتانۋ، كوبىرەك قوزعالۋ، ىشىمدىك ءىشۋ مەن تەمەكى شەگۋدەن باس تارتۋ، كوپ ۋايىمداماۋ، ۇيقى قاندىرۋ.
