قاراماعىنداعى قىزمەتكەردىڭ جەمقورلىعى ءۇشىن قانشا شەنەۋنىك جۇمىستان قۋىلدى
نۇر- سۇلتان. قازاقپارات - مەملەكەتتىك قىزمەت ىستەرى اگەنتتىگى باقىلاۋ دەپارتامەنتىنىڭ ديرەكتورى ەرلان ساپاروۆ قاراماعىنداعى قىزمەتكەردىڭ سىبايلاس جەمقورلىققا ۇرىنعانى ءۇشىن نەشە شەنەۋنىك جازالانعانىن ايتتى، دەپ حابارلايدى قازاقپارات ءتىلشىسى.
دەپارتامەنت باسشىسى مەملەكەتتىك ورگان باسشىلارى سىبايلاس جەمقورلىققا ۇرىنعانى قول استىنداعى قىزمەتكەر ءۇشىن جاۋاپكەرشىلىك ارقالايتىن زاڭنامالىق تالاپ 2019 -جىلعى 10- جەلتوقساننان باستاپ قولدانىسقا ەنگىزىلگەنىن اتاپ ءوتتى. سودان بەرى قاراماعىنداعىلاردىڭ سىبايلاس جەمقورلىققا ۇرىنعانى ءۇشىن 264 مەملەكەتتىك قىزمەتشى جازالانعان.
«بيىل 9 ايدا قاراماعىنداعى قىزمەتكەرلەردىڭ سىبايلاس جەمقورلىعى ءۇشىن توعىز ساياسي مەملەكەتتىك قىزمەتشى وتستاۆكا تۋرالى ءوتىنىش ءتۇسىردى. ءۇش جاعدايدا وتستاۆكا قابىلدانىپ، التى جاعدايدا قابىلدانبادى. بۇل التى جاعدايدىڭ بەسەۋىندە ساياسي مەملەكەتتىك قىزمەتكەرلەر ءارتۇرلى تارتىپتىك جاۋاپكەرشىلىككە تارتىلدى»، - دەدى ەرلان ساپاروۆ ورتالىق كوممۋنيكاتسيالار قىزمەتىندە وتكەن بريفينگىندە.
شارادا مەم قىزمەتشىلەرگە جۇمىستان تىس ۋاقىتتا قوسىمشا تابىس تابۋعا رۇقسات بەرىلۋ مۇمكىن ەكەنى ايتىلعان بولاتىن.
«بۇگىنگى كۇنى زاڭنامادا مەملەكەتىك قىزمەتشىگە قوسىمشا جۇمىسپەن اينالىسۋعا رۇقسات بەرەتىن نورما جوق. ءبىراق ءبىز بولاشاقتا زاڭعا ەنگىزۋدى ويلاستىرىپ جاتىرمىز. ياعني جۇمىستان بوس كەزىندە قوسىمشا جۇمىسپەن اينالىسۋعا بولادى دەپ كىرگىزەمىز. ءدال ءقازىر زاڭنامادا بۇل جوق. ءبىراق ءبىز دايىنداپ جاتىرمىز»، - دەدى ق ر مەملەكەتتىك قىزمەت ىستەرى اگەنتتىگىنىڭ ءتوراعاسى انار جايىلعانوۆا.
اۆتور: ەسىمجان ناقتىباي
