تىسىمەن ءماتىن تەرەتىن بلوگەر تۇركيادا ەمدەلىپ جاتىر

دەگەنمەن، شالقار مۇنداي قادامعا قىزىعۋشىلىقتان ەمەس، قاجەتتىلىكتەن بارعاندىعىن ايتادى. شالقارمەن الدىمەن تەلەفون ارقىلى تىلدەستىك. ءسوزى نىق، يبالى جىگىت سويلەۋ مانەرىمەن ءبىزدى دە وزىنە باۋراپ الدى. سودان ارادا اپتا وتكەندە ۇيىندە جولىقتىق. توسەك تارتىپ جاتقان ونىڭ قول- اياعى مۇلدەم قيمىلداۋدان قالىپتى. اس- اۋقاتتى دا ارنايى كومەكشىنىڭ بەرۋىمەن ىشەدى. قاتال تاعدىردىڭ سىناعىنا ۇشىراعان جىگىتتىڭ جان جاراسىن سوزبەن ايتىپ جەتكىزۋ مۇمكىن ەمەس.

شالقار 1992 -جىلى شىمكەنت قالاسىندا دۇنيەگە كەلگەن. مەكتەپتى ۇزدىك بىتىرگەن سوڭ، ۇ ب ت- دان 121 بالل جيناپ، سۇلەيمەن دەميرەل اتىنداعى ۋنيۆەرسيتەتكە قۇجاتتارىن وتكىزىپ قويعان. قورىتىندىسىن كۇتىپ جۇرگەن ساتتە تارازعا قوناققا بارادى. دەگەنمەن بۇل ساپار ونىڭ ءومىرىن تۇبەگەيلى وزگەرتەتىن بىلگەن جوق.

«اكۆوپارككە بارىپ، سۋعا تۇستىك. شومىلدىق. سۋعا سەكىرگەنىمدى بىلەمىن. ارمەن قاراي اياق- قولىم ىستەمەي قالدى. قيمىلداتا المايمىن. باسىم جارىلعان ەكەن. ال قاسىمداعىلار جۇگىرىپ ءجۇر. تۇك تۇسىنبەيمىن. ءبىر كەزدە كوپشىلىك سۋدان شىعارىپ الدى. جەدەل جاردەم كەلدى. كەيىننەن ءبىلدىم، جۇلىنىما زاقىم كەلىپتى. سودان ەكى اياق، ەكى قولىم ىستەمەي قالدى»، - دەيدى شالقار مارات ۇلى.

سودان بەرى ون جىلدان استام ۋاقىت ءوتتى. اتا- اناسى ەم- دوم جاساتۋ ءۇشىن كوپتەگەن اۋرۋحانالاردىڭ ەسىگىن قاقتى. ءتىپتى شەتەلگە دەيىن الىپ باردى. ءبىراق ناتيجە جوق. كۇيزەلىسكە تۇسكەن جىگىت وقۋىن دا جالعاستىرا المادى.

«ماتەماتيكاعا قاتتى قىزىعاتىنمىن. ەسەپ شىعارۋدا ءاردايىم ءبىرىنشى بولىپ ورىندايتىن ەدىم. «بولاشاقتا ماتەماتيك بولامىن» دەگەن ماقسات قويدىم. دەگەنمەن بۇل ارمانىم ورىندالمادى. مەملەكەتتىك گرانتپەن وقۋعا تۇسكەنىمدى كەيىننەن ءبىلدىم. ۋنيۆەرسيتەت باسشىلىعى دا ماعان ءبىر جىل اكادەميالىق دەمالىس الۋىما مۇمكىندىك بەردى. جازىلسام جالعاستىرامىن دەپ ويلادىم. امال نەشىك...» - دەيدى ول. الەۋمەتتىك جەلى شالقارعا الدانىش بولدى.

ءبىر جاعىنان تاۋلىك بويى توسەككە تانىلعان ونىڭ ەكىنشى تىنىسىن اشتى. قازىر دوستارىمەن حابارلاسىپ، سويلەسىپ تۇرادى. مۋزىكا تىڭداپ، كينو كورەدى. جەلىگە كىرىپ، جاڭالىقتاردى وقيدى. ءتىپتى Instagram ارقىلى تابىس تاۋىپ وتىر. مۇنىڭ بارشاسىندا شالقار قالامساپتى تىستەۋ ارقىلى ىسكە اسىرادى.

«ارينە، Instagram-عا كىرىپ، بلوگ جۇرگىزىپ قارجى تابۋ جاقسى. ءبىراق مەن ءۇشىن بۇل قىزىعۋشىلىق ەمەس، قاجەتتىلىك بولدى. ون جىل وسى بولمەدە تەلەديدار كورىپ قيمىلداي الماي جاتتىم. اكە- شەشەم دە قارتايا باستادى. ماعان كومەكتەسۋگە ءىنىمنىڭ دە شاماسى كەلمەيدى. بارشاسىنىڭ ءوز شارۋالارى بار. اۋرە ەتە بەرگىم كەلمەيدى. سوندىقتان ماعان جەكە كومەكشى كەرەك. كوشەگە الىپ شىعىپ، قىدىرتاتىن، شاشتارازعا، ساياباققا الىپ باراتىن ادام قاجەت. ونىڭ شىعىندارىن دا اكە- شەشەمە ارتا بەرۋگە بولمايدى. اكەم قاراۋىل، مامام كىتاپحاناشى بولىپ قىزمەت اتقارادى. سوندىقتان قاراجاتتى ءوزىم تابۋىم كەرەك دەپ شەشتىم»، - دەيدى ول.

شالقاردىڭ جەلىدەن پاراقشا اشقانىنا ءبىر جىلعا جۋىق ۋاقىت بولعان. قازىر 10 مىڭعا جۋىق وقىرمانى بار. بلوكتارىن دا تۇراقتى تۇردە كورىپ وتىراتىندار كوپ. كوممەرتسيالىق نىساندار جارناما بەرىپ اقىسىن تولەپ تۇرادى. ال كەيبىرىمەن ءوزارا كەلىسىم جاسايدى. جارناماسىن جاساپ بەرگەن شاشتارازعا بارىپ شاشىن تەگىن الدىرسا، كەي كافەلەر مەن دۇكەندەردىڭ قىزمەتىن «جەڭىلدىكپەن» تۇتىنادى. «مەنىڭ ماقساتىم قارجىلاي تاۋەلسىز بولۋ. العاشقىدا تىسىممەن قالامساپ تىستەپ، ۇزاق ءماتىن جازۋ قيىندىق تۋدىردى. كەيىن قالىپتاسىپ كەتتىم. مەن ءۇشىن ۇيرەنۋ، جۇمىس ىستەۋ - ەشقاشان كەش ەمەس»، - دەيدى ينستابلوگەر.

قازىر شالقار تۇركيادا ەم قابىلداپ جاتىر. 11 جىل بويى ارباعا وتىرعان ونىڭ جامباسىنداعى ەتكە زاقىم كەلگەن. ونى تەك شەتەلدە عانا ەمدەۋگە مۇمكىندىك بار. سوندىقتان جەلى ارقىلى جاعدايىن ايتىپ، كوپشىلىكتەن جاردەم سۇرادى. تاۋەكەل ەتىپ، جينالعان قارجىمەن جولعا شىقتى.

«ارباعا كوپ وتىرعاندىقتان ەكى جامباسىم تەسىلىپ، جاراسى ۇلعايىپ سۇيەككە ءوتۋدىڭ از-اق الدىندا تۇر. شەتەلدە ەمدەتۋ ءۇشىن 50 مىڭ دوللارداي اقشا كەرەك بولدى. كاسىپكەر سىرىمبەك تاۋ اعامىز باسشىلىق ەتەتىن جەكە كومپانيا 10 مىڭ دوللار بەردى. قالعان سومانى جيناۋعا وتباسىمنىڭ شاماسى جەتپەدى. جەلى ارقىلى جينالعان اقشامەن قازىر تۇركيادا ەمدەلىپ جاتىرمىن. مۇندا قانشا اي، قانشا كۇن جاتاتىنىمدى بىلمەيمىن»، - دەيدى ول.

شالقار تىسىمەن ءماتىن تەرە الاتىندىعىن دالەلدەدى. ۇيالى تەلەفونمەن جازۋ جازۋ وزىنە دە ۇنايدى. سوندىقتان، قازىر تەك ءوزىنىڭ پاراقشاسىن دامىتىپ، ءماندى دە ماعىنالى ويلارمەن ءبولىسىپ وتىرادى. اراسىندا جەلى ارقىلى «Qazaq Republic»، «Yokohama» كومپانيالارىنىڭ پيار- مەنەدجەرى رەتىندە پوست جازىپ تۇرادى. قولداۋ ءبىلدىرىپ، كومەك بەرىپ وتىراتىن ساكەن جولداس، سىرىمبەك تاۋ، قايرات جولدىباي ۇلى اعالارىمەن، وزگە دە وقىرماندارىنا ايتار العىسى شەكسىز.

«بىردە جانۇيامىزبەن بىرگە قوناققا بارماقشى بولدىق. اكەم مەنى كوتەرىپ، ۇيدەن شىعارىپ، كولىككە وتىرعىزباق بولدى. ەڭكىلدەپ، وكپەسى ءوشىپ، قينالىپ قالدى. بۇل ماعان قاتتى اسەر ەتتى. جاسى بولسا 55-تە. ۇيدە قينالعانىن بىلدىرمەيدى.

سول وقيعا بىرنەشە رەت قايتالاندى. ماعان قاراپ، جاعدايىمدى جاساۋ وڭاي ەمەس ەكەندىگىنە كوزىم جەتتى. جاتا بەرسەم جاعداي ۋشىعا تۇسەتىنىن ۇقتىم. اتا-انام جاسارمايدى. باۋىرىم ۇيلەنىپ ءوز وزىمەن بولادى. سوندا مەن نە ىستەمەكپىن؟ مەنى وسى وي كوپ مازالايدى. سوندىقتان قارجىلىق تاۋەلسىز بولۋعا ارەكەتتەنىپ ءجۇرمىن. نەگىزى بۇل دياگنوزبەن كوپ ادامنىڭ ءتىرى قالۋى ەكىتالاي ەكەن. ال، مەنىڭ وسىلاي جاتقانىمنىڭ ءوزى اللانىڭ سىيى دەپ بىلەمىن. سەبەبى، بۇل ومىردە مەنىڭ دە ميسسيام بار. ادامدارعا كەرەكپىن»، - دەيدى شالقار قۋانىشبايەۆ.

اۆتور: قايرات زاينيشەۆ