جاڭا جىل مەرەكەسىندە تاماقتان ۋلانباۋ ءۇشىن نە ىستەۋ كەرەك - دارىگەر كەڭەسى

جاڭا جىل - كوپشىلىكتىڭ اسىعا كۇتەتىن سۇيىكتى مەرەكەسى. ءداستۇر بويىنشا مول ەتىپ داستارحان جايىلىپ، ۇستەل ۇستىندە ءتاتتى-دامدىدەن بوس ورىن قالمايدى. الايدا مۇندايدا اباي بولماساڭ، مەرەكەنىڭ قالعان كۇندەرىن توسەكتە، ءتىپتى اۋرۋحانادا وتكىزۋىڭ عاجاپ ەمەس.

س ق و سانيتاريالىق-ەپيدەميولوگيالىق باقىلاۋ دەپارتامەنتىنىڭ تاماقتانۋ وبەكتىلەرىن باقىلاۋ جانە قاداعالاۋ ءبولىمىنىڭ باسشىسى ناتاليا بەليايەۆانىڭ ايتۋىنشا، تاماقتان ۋلانىپ قالماۋ ءۇشىن داستارحانداعى تاعام ءدامدى عانا ەمەس، دەنساۋلىق ءۇشىن قاۋىپسىز دە بولۋى قاجەت.

«مەديتسينالىق ستاتيستيكا مەرەكە كۇندەرى تاماقتان ۋلانۋ جاعدايلارىنىڭ ەداۋىر ارتاتىنىن كورسەتەدى. بۇل، ەڭ الدىمەن، مەرەكە كۇندەرى ادامنىڭ ادەتتەگىدەن الدەقايدا كوپ تاماق ىشەتىندىگىنە بايلانىستى. تۇتىناتىن تاعام ءاردايىم ساپا مەن گيگيەنا ستاندارتتارىنا سايكەس كەلمەيدى، ال مەرەكەلىك تاعامدار كەيدە بىرنەشە كۇن ساقتالادى. سالدارىنان ءبۇلىنىپ، تاماقتان ۋلانۋ قاۋپىن ارتتىرادى. بيىل وبلىس بويىنشا تاماقتان ۋلانۋدىڭ 7 فاكتىسى تىركەلدى، ولاردىڭ بارلىعى ۇيلەرىندە ۋلانعان. بىلتىر ۇقساس كەزەڭىندە وسىنداي 12 جاعداي تىركەلدى. بارىندە دە تۇرعىندار تاماق ونىمدەرىن ساقتاۋ شارتتارى مەن كۇندەلىكتى جەكە گيگيەنا ەرەجەلەرىن بۇزعان»، - دەيدى ناتاليا بەليايەۆا.

ماماننىڭ ايتۋىنشا، ءسۇت ونىمدەرىنىڭ بارلىق تۇرلەرى، شيكى جۇمىرتقا، ءارتۇرلى ەت تۇرلەرى، تۋرالعان كوكونىس تاعامدارى، كونديتەرلىك ونىمدەر، اسىرەسە تورتتار مەن اقۋىز كرەمى بار تورتتار ۋلانۋعا اكەلەدى. ەت جانە بالىق تاعامدارى، سونداي-اق مايونەز قوسىلعان سالاتتار تەز بۇزىلاتىن ونىمدەر توبىنا جاتادى.

«تىزىمگە دەسەرتتەر، قايماق نەمەسە سارى ماي قوسىلعان تورتتار دا كىرەدى. قايماق نەمەسە مايونەز قوسىلعان دايىن سالاتتار مەن ەت تاعامدارىنىڭ جارامدىلىق مەرزىمى وتە شەكتەۋلى. ەگەر ولار ءتۇنى بويى جىلى بولمەدە ۇستەلدە تۇرسا، وندا تاڭەرتەڭ ولاردى تۇتىنۋ قاۋىپتى. ماي، مايونەز قوسىلعان سالاتتاردى توڭازىتقىشتا 12 ساعات، قايناتىلعان، بۇقتىرىلعان، قۋىرىلعان كوكونىستەردەن جاسالعان تاعامداردى 24 ساعات، ەت تاعامدارىن 36 ساعاتتان اسىرماي ساقتاۋعا بولادى»، - دەيدى سانيتار دارىگەر.

جۇقپالى اۋرۋلاردىڭ، تاماقتان ۋلانۋدىڭ الدىن الۋ ماقساتىندا د د ۇ تاماق دايىنداۋ كەزىندە بەس نەگىزگى ءادىستى ساقتاۋدى ۇسىنادى.

ولار: تازالىقتى ۇستاۋ، شيكى جانە پىسىرىلگەن تاعامداردى بولەك ساقتاۋ، تاعامداردى جاقسىلاپ قۋىرۋ نەمەسە قايناتۋ، ونىمدەردى قاۋىپسىز تەمپەراتۋرادا ساقتاۋ جانە تازا سۋدى جانە قاۋىپسىز شيكى تاعامدى قولدانۋ.