مينيستر جەكە قوسالقى شارۋاشىلىقتاردى قولداۋعا قاتىستى تۇسىنىك بەردى

«بۇگىنگى تاڭدا اتالعان زاڭ جوباسى ازىرلەندى. زاڭ جوباسىنىڭ ءبىرىنشى نۇسقاسى «اشىق نورماتيۆتىك قۇقىقتىق اكتىلەر» سايتىندا ورنالاستىرىلدى. تالقىلاۋ بارىسىندا ءبىز 1600 گە جۋىق ەسكەرتۋ مەن ۇسىنىس الدىق. اتالعان زاڭ جوباسىنىڭ نەگىزگى جاڭالىقتارى مىنالار: جەكە قوسالقى شارۋاشىلىق قىزمەتىنىڭ زاڭنامالىق نەگىزىن قۇرۋ. وكىنىشكە قاراي، بۇل - ادام قىزمەتىنىڭ زاڭمەن رەتتەلمەگەن سالالارىنىڭ ءبىرى. ونىڭ مارتەبەسى دە ايقىندالماعان. ءبىز زاڭ جوباسىندا جەكە قوسالقى شارۋاشىلىقتى ازاماتتىڭ جالدامالى جۇمىس كۇشىن تارتپايتىن كاسىپكەرلىك ەمەس قىزمەتى رەتىندە تىركەدىك. ەكىنشىدەن، كووپەراتيۆتەر ارقىلى ولارعا مەملەكەتتىك قولداۋ شارالارىن كورسەتۋ ءۇشىن نورمالار ەنگىزىلدى»، - دەدى ە. قاراشوكەيەۆ ورتالىق كوممۋنيكاتسيالار قىزمەتىندە.

بۇدان بولەك مينيستر جەرگىلىكتى اتقارۋشى ورگاندارعا جەرگىلىكتى مۇمكىندىكتەر ەسەبىنەن جەكە قوسالقى شارۋاشىلىقتارعا قولداۋ كورسەتۋ، جەرگىلىكتى بيۋدجەتتەرگە ءتيىستى شىعىن باپتارىن ەنگىزۋ وكىلەتتىكتەرى بەرىلەتىنىن اتاپ ءوتتى.

«مۇنىڭ ءبارى جەكە قوسالقى شارۋاشىلىقتارعا قاتىستى ادىلەتسىزدىكتى جويۋ ءۇشىن وتە ماڭىزدى. ال ول ادىلەتسىزدىكتىڭ بارى راس. اتاپ ايتقاندا، بۇگىندە ەلدە 1,6 ميلليون جەكە قوسالقى شارۋاشىلىق بار، وندا ەلدىڭ مال باسىنىڭ جارتىسىنا جۋىعى شوعىرلانعان، ولار ءىس جۇزىندە مەملەكەت تاراپىنان ەشقانداي قولداۋ الماي- اق ەلدىڭ ىشكى نارىعىنىڭ مال شارۋاشىلىعى ونىمدەرىنە دەگەن قاجەتتىلىكتىڭ جارتىسىنا جۋىعىن قاناعاتتاندىرىپ وتىر. سونىمەن قاتار ولاردى جايىلىمدىق جەرلەرمەن جانە ازىقپەن قامتاماسىز ەتۋ ماسەلەلەرى ءالى دە شەشىلمەگەن. بۇل پروبلەما جىل وتكەن سايىن ەرەكشە وزەكتىلىككە يە بولا تۇسۋدە. مۇنى بيىلعى قۇرعاقشىلىق دالەلدەپ بەردى، وسىنىڭ سالدارىنان ماڭعىستاۋ وبلىسى قاتتى زارداپ شەكتى»، - دەدى مينيستر.

«شىن مانىندە، بيىل بىزدەگى مال شارۋاشىلىعى سالاسىنىڭ اۋا رايى جاعدايىنا بارىنشا وسال ەكەنىن كورسەتتى. كەشە عانا مەن وڭىرلەردەن كەلگەن فەرمەرلەرمەن كەزدەستىم. ولاردى تىڭداعاننان كەيىن مەن بۇل ماسەلەنى شەشۋ ءۇشىن ءبىر رەتتىك ءىس- شارالار ەمەس، جۇيەلى شارالار قاجەت ەكەنىنە تاعى دا كوز جەتكىزدىم»، - دەدى ۆەدومستۆو باسشىسى.