جانۋاردى جەكە سايكەستەندىرۋ ءنومىرى: تەرى استىندا چيپ بولادى
نۇر- سۇلتان. قازاقپارات - اۋىل شارۋاشىلىعى ءمينيسترى ەربول قاراشوكەيەۆ ءۇي جانۋارلارىنىڭ جەكە سايكەستەندىرۋ نومىرىنە قاتىستى تۇسىنىك بەردى، دەپ حابارلايدى قازاقپارات ءتىلشىسى.
«ءبىز سونداي- اق جەكە سەكتورداعى ۆەتەريناريالىق پراكتيكانى دامىتۋ ءۇشىن ادامداردىڭ دەنساۋلىعىنا ءقاۋىپ توندىرمەيتىن اۋرۋلاردىڭ 5 ءتۇرى بويىنشا كۇرەسۋ مەن الدىن الۋ جۇمىستارىن باسەكەلەستىك ورتاعا بەرىپ، سالانى كەڭەيتپەكپىز»، - دەدى ە. قاراشوكەيەۆ ورتالىق كوممۋنيكاتسيالار قىزمەتىندە.
ونىڭ ايتۋىنشا، ۆەتەريناريا سالاسىن تسيفرلاندىرۋعا ەرەكشە ماڭىز بەرىلەدى.
«قازىرگى ۋاقىتتا ءبىز جاڭا باعدارلامالىق ءونىمنىڭ العاشقى جۇمىستىق نۇسقاسىن ازىرلەۋدى اياقتاپ جاتىرمىز. بۇل جەرگىلىكتى جەردەن اقپارات قالىپتاستىرۋ، ونى جانۋارلار تۋرالى ورتالىق دەرەكقورعا بەرۋ پروتسەستەرىن تولىعىمەن اۆتوماتتاندىرۋعا جانە وسى پروتسەستەردىڭ بارلىعىنا ادامي فاكتور اسەرىن بولدىرماۋعا مۇمكىندىك بەرەدى. ۆەتەريناريالىق ماماندا وسى باعدارلامانىڭ ءموبيلدى قوسىمشاسى بولادى، ول ونى قاعازباستىلىقتان بوساتادى. جانۋاردا ادامنىڭ جەكە سايكەستەندىرۋ ءنومىرى سياقتى ءبىر عانا سايكەستەندىرۋ ءنومىرى بولادى دەپ بولجانۋدا. ول جانۋاردىڭ ومىرلىك سيكلىنىڭ بۇكىل كەزەڭىندە تەرى استىنداعى چيپتە ورنالاسادى. كەلەسى جىلى اتالعان باعدارلامانى ءبىر اۋداننىڭ بازاسىندا تەستىلىك رەجيمدە سىناقتان وتكىزىپ، تولىق پىسىقتالعاننان كەيىن 2023 -جىلدان باستاپ رەسپۋبليكا بويىنشا كەزەڭ- كەزەڭىمەن ەنگىزۋدى جوسپارلاپ وتىرمىز»، - دەدى مينيستر.
