ساياسي قۋعىن- سۇرگىن قۇرباندارىن تولىق اقتاۋ جونىندەگى مەمكوميسسيا جۇمىسىن قورىتىندىلادى
نۇر- سۇلتان. قازاقپارات - قىرىمبەك كوشەربايەۆ ساياسي قۋعىن- سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ كەزەكتى وتىرىسىن وتكىزدى، دەپ حابارلايدى اقوردا.
وتىرىستا ساياسي قۋعىن- سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ جوبالىق كەڭسەسى، كىشى كوميسسيالارى، جۇمىس توپتارى جانە وڭىرلىك فيليالدارىنىڭ بيىلعى اتقارعان قىزمەتىنىڭ نەگىزگى قورىتىندىلارى قاراستىرىلىپ، 2022 -جىلعا ارنالعان جۇمىستىڭ باسىم باعىتتارى ايقىندالدى.
جيىن بارىسىندا پرەمەر- ءمينيستردىڭ ورىنباسارى ەرالى توعجانوۆ، ءبىلىم جانە عىلىم ءمينيسترى اسحات ايماعامبەتوۆ، مادەنيەت جانە سپورت ءمينيسترى اقتوتى رايىمقۇلوۆا، اقپارات جانە قوعامدىق دامۋ ءمينيسترى ايدا بالايەۆا، الماتى قالاسىنىڭ اكىمى باقىتجان ساعىنتايەۆ، ماڭعىستاۋ وبلىسىنىڭ اكىمى نۇرلان نوعايەۆ جانە باسقالار بايانداما جاسادى. سونداي- اق، باس پروكۋرور عيزات نۇرداۋلەتوۆ، ىشكى ىستەر ءمينيسترى ەرلان تۇرعىمبايەۆ جانە ۇلتتىق قاۋىپسىزدىك كوميتەتى ءتوراعاسىنىڭ ورىنباسارى نۇرعالي بىلىسبەكوۆ جابىق قورلاردا جۇرگىزىلگەن جۇمىستار تۋرالى باياندادى.
مەملەكەتتىك كوميسسيا ءتوراعاسى قىرىمبەك كوشەربايەۆ بۇگىنگى تاڭدا ورتالىقتا جانە وڭىرلەردە مەملەكەتتىك كوميسسيانىڭ تۇتاس ۇيىمدىق قۇرىلىمى قالىپتاسقانىن، ادىستەمەلىك بازا ازىرلەنىپ، زەرتتەۋ جۇمىستارىنا قاتىستى ءبىرىڭعاي ءادىستىڭ ايقىندالعانىن، ماقساتتى اقپاراتتىق ستراتەگيا قۇرىلىپ، مەملەكەتتىك، ۆەدومستۆولىق جانە شەتەلدىك ارحيۆتەردە جۇيەلى ىزدەستىرۋ جۇمىستارى جولعا قويىلعانىن اتاپ ءوتتى.
جيىندا ساياسي قۋعىن- سۇرگىن قۇرباندارىنىڭ جالپى بازاسىن جانە مەملەكەتتىك كوميسسيا قۇرىلىمدارىنىڭ قىزمەتى تۋرالى اقپاراتتاردى قامتيتىن مەملەكەتتىك كوميسسيانىڭ ەلەكتروندىق پورتالى تانىستىرىلدى. سونىمەن بىرگە، كوميسسيا مۇشەلەرى مەملەكەتتىك ارحيۆتەردە قۇرىلعان قۋعىن- سۇرگىن ماسەلەلەرى جونىندەگى ارنايى قورلار جايىندا، تمد جانە ەۋروپالىق وداق ەلدەرىمەن حالىقارالىق ىنتىماقتاستىقتى دامىتۋ تۋرالى باياندادى.
وتىرىس قورىتىندىسى بويىنشا ۇكىمەتكە، ورتالىق جانە جەرگىلىكتى اتقارۋ، قۇقىق قورعاۋ ورگاندارىنىڭ باسشىلارىنا 2022 -جىلعا ارنالعان جۇمىستىڭ باسىم باعىتتارى بويىنشا، اتاپ ايتقاندا، جيناقتالعان ارحيۆ ماتەريالىن تالدامالىق جانە ساراپتامالىق باعالاۋدى ۇيىمداستىرۋ، ايماقتاردا زەرتتەۋ جۇمىسىن قامتاماسىز ەتۋ جانە مەملەكەتتىك كوميسسيانىڭ باسپا قىزمەتىن كەڭەيتۋ جونىندە ناقتى تاپسىرمالار بەرىلدى.
