بوكستان قازاقستان چەمپيوناتى: العاشقى جەڭىمپازدار انىقتالدى

ورال. قازاقپارات - ورالدا تەننيس ورتالىعىندا تاۋەلسىزدىكتىڭ 30 جىلدىعىنا وراي بوكستان ەرلەر اراسىندا قازاقستان چەمپيوناتىنىڭ فينالدىق باسەكەلەرى وتۋدە، دەپ حابارلايدى قازاقپارات ءتىلشىسى.

شارشى الاڭعا العاشقى بولىپ اسا جەڭىل سالماقتا باتىس قازاقستاندىق دانيال ءسابيت پەن ەلوردالىق سانجار تاشكەنباي شىقتى. بۇل باسەكەدە جاستار اراسىندا 2021 -جىلعى الەم جانە ازيا چەمپيونى س. تاشكەنباي جەڭىسكە جەتتى. بۇدان كەيىن 51 ك گ سالماقتا تاعى ءبىر باتىسقازاقستاندىق نۇرسۇلتان نۇريدەنوۆ پەن الماتى وبلىسىنىڭ وكىلى دامير ءابدىقادىر چەمپيوندىق اتاقتى ساراپقا سالدى.

مۇندا تورەشىلەردىڭ ءبىراۋىزدان شەشىمىمەن د. ءابدىقادىردىڭ قولى كوتەرىلدى. سونداي-اق 54 ك گ سالماقتا تارتىستى باسەكەدە 3:2 ەسەبىمەن اتىراۋلىق ولجاس باينيازوۆتى سۇرىندىرگەن قاراعاندىلىق تالعات سىرىمبەتوۆ ۇزدىك شىقتى. فينالدىق جەكپە-جەكتەر ودان ءارى جالعاسۋدا.

ەسكە سالا كەتەيىك، بۇدان بۇرىن ەل چەمپيوناتىندا العاشقى فيناليستەر بەلگىلى بولعانىن جازعان ەدىك.

اۆتور: ەلجان ەرالى