الەمدەگى ەرەكشە توتىقۇستار

اقىلدى جانە كۇلكىلى، ولاردىڭ كوپتەگەن ەلدەردە ءۇي جانۋارلارى سياقتى تانىمال بولۋى بەكەر ەمەس.

ەجەلگى ريمدە توتىقۇس قۇلعا قاراعاندا قىمبات بولدى. قازىرگى ۋاقىتتا توتىقۇس تۇرلەرىنىڭ شامامەن ۇشتەن ءبىرى ادام ارەكەتى مەن براكونەرلىك سالدارىنان جويىلىپ كەتۋ قاۋپىندە تۇر. ماسساگەت پورتالى الەمدەگى ەرەكشە توتىقۇستاردى نازارىڭىزعا ۇسىنادى.

كىشكەنتاي تاپسىرىس بەرۋشى

كورين ەسىمدى بريتاندىق ايەل سۇيكىمدى سىيلىق قوراپتارىن العان كەزدە قاتتى تاڭ قالعان. سەبەبى، ول ەشقانداي زاتقا تاپسىرىس بەرمەگەن بولاتىن. وتباسى مۇشەلەرىنىڭ ەشقايسىسى تاپسىرىس تۋرالى بىلمەيتىن بولىپ شىعادى. ءبىراق كوپ ۇزاماي وقيعانىڭ باستى كەيىپكەرى تابىلادى. بۇل وتباسىنىڭ ءبىر مۇشەسى بۋدي ەسىمدى توتىقۇس بولىپ شىقتى. بۋدي يەسىنىڭ داۋىسىندا ينتەرنەت-دۇكەننىڭ مازىرىنە كىرىپ، داۋىستىق كومەكشى ارقىلى تاپسىرىس بەرگەن.

كورين تاپسىرىسقا كەتكەن 10 فۋنت ستەرلينگتى قايتارا الماعان. وسىدان سوڭ ول داۋىس ارقىلى تاپسىرىس بەرەتىن باعدارلامانى وشىرگەن. بۇل قۇس كەلەسى جولى نە تاپسىرىس بەرەتىنىن كىم بىلەدى...

جەكە دەتەكتيۆ

بۇل توتىقۇستىڭ يەسى ونى سويلەۋگە ۇيرەتكەنىنە مىڭ رەت وكىنگەن. ويتكەنى ول كۋۆەيتتىك جىگىتتىڭ بارلىق قۇپياسىن اشقان. توتىقۇس قوجايىنىنىڭ ءۇي كۇتۋشىسى بولعان ايەلگە سىبىرلاعان سوزدەرىنىڭ ءبارىن قايتالاي باستاعان. ناتيجەسىندە ءۇي يەسىنىڭ ايەلى سوتقا جۇگىنگەن، ويتكەنى كۋۆەيت مۇنداي قارىم-قاتىناستار ءۇشىن قاتاڭ جازا تاعايىندايدى. الايدا، قۇستىڭ ايعاعى ەلەۋلى دالەل رەتىندە قاراستىرىلمادى. سول سەبەپتى ەر ادام جازادان قۇتىلعان.

توتىقۇس ۇرىلار

ءۇندىستاننىڭ ءبىر پروۆينتسياسىنىڭ فەرمەرلەرى جىلدار بويى كوكنار القاپتارىنا توتىقۇستاردىڭ باسىپ كىرۋىنە قارسى كۇرەسىپ كەلەدى.

قۇستاردىڭ مۇنداي ارەكەتى العاش رەت 2015-جىلى بايقالعان. جىل سايىن شارۋالار مۇنداي قۇس تورلارىنىڭ سانى ارتىپ كەلەتىنىن ايتادى. ايلاكەر قۇستار ەگىنشىلەر كوكناردى وندىرگەنشە كۇتەدى، سودان كەيىن ءۇنسىز ەگىن القابىنا كىرىپ، قالاعان ولجاسىن الىپ، ۇشىپ كەتەدى.

ۇرىنى ۇستاپ بەرگەن توتىقۇس

ءۇندىستاندا توتىقۇستار ۇرى اتانسا، كەرىسىنشە امەريكادا ولار ۇرىنى ۇستاپ بەرەدى. ا ق ش- تا توتىقۇس ءۇي توناۋ ءىسىن اشۋعا كومەكتەسكەن وقيعا ورىن العان. بوس پاتەردەگى قىلمىسكەرلەر ەش ويلانباستان ءبىر-ءبىرىن اتى-جونىمەن اتاعان، ال توتىقۇس بۇل ەسىمدەردى ەسىنە ءتۇسىرىپ، پوليتسەيلەردىڭ كوزىنشە بىرنەشە رەت قايتالاعان. توتىقۇستىڭ بۇل ءىسى ۇرىلاردىڭ ىزىنە تۇسۋگە كومەكتەسكەن.

ەڭ اقىلدى توتىقۇس

الەمدەگى ەڭ اقىلدى توتىقۇس الەكس ەسىمدى 400 ءسوز بىلەتىن توتىقۇس بولعان.

جالپى، افريكالىق توتىقۇستار توبىنا جاتاتىن جاكو - ەڭ قابىلەتتى توتىقۇس. ول ينتەللەكتۋالدى دامۋدا ەڭ جوعارى ناتيجە كورسەتكەن. سۇر توتىقۇس گيننەستىڭ رەكوردتار كىتابىنا ەنىپ، الەمدەگى ەڭ اقىلدى توتىقۇس اتاعىن العان.

بۇل اتاق دوكتور يرەن پەپپەربەرگتىڭ تاجىريبەسىنە قاتىسقان الەكس ەسىمدى (1976-2007) توتىقۇسقا بەرىلدى. وسى عىلىمي جۇمىستىڭ ارقاسىندا عالىمدار قۇستار جەتكىلىكتى اقىلدى ەمەس جانە تەك بەيسانالىق تۇردە، ءبىراق سويلەۋ مەن دىبىستارعا ءساتتى ەلىكتەي الادى دەگەن پىكىردى جوققا شىعارا الدى.

الەكس توتىقۇستاردىڭ لوگيكانى پايدالانىپ، تاپسىرمالار نەگىزىندە قورىتىندى شىعارا الاتىنىن، ولاردىڭ قاراپايىم ماتەماتيكالىق ەسەپتەۋلەر جۇرگىزۋگە قابىلەتى بار ەكەنىن دالەلدەدى. ولار ۇيرەنگەن سوزدەردىڭ ماعىناسىن باستاپقى دەڭگەيدە تۇسىنەدى جانە ادامدارمەن قارىم-قاتىناس كەزىندە ولاردى سانالى تۇردە قولدانا الادى.