الماتىعا وميكرون شتامىنىڭ كەلەتىنى ءسوزسىز - باقىتجان ساعىنتايەۆ
الماتى. قازاقپارات - الماتى اكىمى باقىتجان ساعىنتايەۆ «الماتى» تەلەارناسىنداعى تىكەلەي ەفير كەزىندە الماتىعا وميكرون شتامىنىڭ كەلەتىنىن ايتتى، دەپ حابارلايدى قازاقپارات ءتىلشىسى.
تىكەلەي ەفير بارىسىندا قالا اكىمى الماتىلىقتارعا جەدەل تۇردە ۆاكسينا العان ءجون ەكەنىن ايتتى.
«قازىرگى كەزدە بىزدە ۆاكسينانىڭ مولشەرى جەتكىلىكتى. ءبىرىنشى جانە ەكىنشى ۆاكسينا ءۇشىن دە، ريەۆاكتسينالاۋ ءۇشىن دە جەتكىلىكتى مولشەرى بار. سوندىقتان الماتىلىقتاردىڭ ۆاكسينالانۋعا جەدەل بارعانى دۇرىس. سەبەبى وميكرون شتامى كەلگەن كەزدە جاعداي قيىنداي تۇسەدى، ال وميكروننىڭ كەلەتىنى ءسوزسىز»، - دەدى باقىتجان ساعىنتايەۆ.
سونداي-اق، قالا اكىمى ەگەر كارانتين تالاپتارى قايتا كۇشەيەتىن بولسا، وعان دايىندىق بارىسى قالاي ەكەنىن ءتۇسىندىردى.
«ءبىز بۇگىن ءوزىمىزدىڭ دارىلىك زاتتار مەن جەكە قورعانىس قۇرالدارى بويىنشا دايىندىعىمىزدى تاعى قاراپ، پىسىقتاپ شىقتىق. ەگەر كارانتين تالاپتارى قايتا كۇشەيتىلسە، وعان دايىن بولۋ ءۇشىن قوسىمشا قاراجاتتى رەزەرۆتە ساقتاپ وتىرمىز، ءدارى-دارمەك پەن جەكە قورعانىس قۇرالدارى جەتكىلىكتى مولشەردە بولۋ ءۇشىن فارماتسيەۆتيكالىق كومپانيالارىمىزعا قوسىمشا تاپسىرىس بەرىپ قويدىق. سونداي-اق، جابدىقتارمەن دە تولىق كولەمدە قامتاماسىز ەتىلگەنبىز»، - دەپ اتاپ ءوتتى الماتى اكىمى.
