قازاقستاندا باسپانا باعاسى قالاي وزگەرەدى - «وتباسى بانك» ءتوراعاسىنىڭ بولجامى

ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا تىلشىلەر باسپانا باعاسى تۇراقتانا ما دەگەن سۇراق قويدى.

«ءوسۋ قارقىنى تومەندەيدى دەپ ويلايمىن. بۇل انىق. ويتكەنى زەينەتاقى جيناعىن پايدالانۋ 1- ساۋىردە اياقتالادى. قازىردىڭ وزىندە كەلىپ تۇسكەن بارلىق وتىنىمدەر - دەپوزيتتەردى تولىقتىرۋعا، يپوتەكانى وتەۋگە ارنالعان، ال تۇرعىن ءۇيدى تولىعىمەن ساتىپ الۋعا وتىنىمدەر وتە از»، - دەپ جاۋاپ بەردى ءلاززات يبراگيموۆا.

بانك ءتوراعاسى دەموگرافيالىق جاعدايدى دا ەسكەرۋ قاجەتتىگىن، قازاقستاندا بالا تۋۋ كورسەتكىشى ارتىپ كەلە جاتقانىن ايتتى.

«جىل سايىن 400000-نان استام بالا دۇنيەگە كەلەدى جانە 60000-نان استام جاڭا نەكە تىركەلەدى. ەكى مىڭىنشى جىلداردىڭ باسىندا تۋعان بالالار ءوسىپ كەلەدى. وسى فاكتورلاردىڭ بارلىعى سۇرانىسقا ەداۋىر اسەر ەتپەك. ءقازىر نارىقتاعى ۇسىنىس وتە ۇلكەن، بۇرىن- سوڭدى بولماعان 15 ميلليون شارشى مەتر باسپانا سالىپ جاتىرمىز. مەنىڭ ويىمشا، باعانىڭ ءوسۋ قارقىنى تومەندەيدى. ءبىراق قازىرگى باعالاردىڭ تومەندەۋىنە كەلسەك، بۇكىل الەمدە بولىپ جاتقان ينفلياتسيانى ەسكەرە وتىرىپ، مۇنداي بولجام جاساماس ەدىم»، - دەپ اتاپ ءوتتى ل. يبراگيموۆا.

بۇعان دەيىن ءلاززات يبراگيموۆا زەينەتاقى جيناعىن پايدالانۋ ارقىلى تۇرعىن ءۇي ساتىپ الۋداعى ەڭ قىمبات جانە ەڭ ارزان كەلىسىمشارتتى اتاعان ەدى.

اۆتور: ايجان سەرىكجان قىزى