قاجىمۇقان فيلمى قاشان كورەرمەنگە جول تارتادى
«قاجىمۇقان مۇڭايتپاس ۇلى تۋرالى بۇعان دەيىن تۇسىرىلگەن فيلمدەردە ورىس پالۋانى يۆان پوددۋبنىيمەن كۇرەسكەن ساتتەرى بۇرمالانىپ، تاريحي شىندىققا قيانات جاسالىپ كەلدى. سونىڭ ورنىن قاشان تولتىرامىز؟»، - دەگەن سۇراق قويىلدى ورتالىق كوممۋنيكاتسيالار قىزمەتىندە وتكەن بريفينگىدە.
مادەنيەت جانە سپورت ءمينيسترى اقتوتى رايىمقۇلوۆانىڭ ايتۋىنشا، بيىل جارىققا شىعۋى جوسپارلانعان جاڭا فيلمدە بالۋاننىڭ ءومىرىن سيپاتتايتىن ءبىرشاما وقيعا قامتىلعان.
«2021 -جىلى قاجىمۇقان مۇڭاتپاس ۇلىنىڭ مەرەيتويى ەكەنىن وسىدان ەكى جىل بۇرىن بىلگەنبىز. «قازاقفيلم» ارقىلى بالۋان تۋرالى فيلم ءتۇسىرۋ جۇمىستارىن باستاپ، سسەناريىن جازعىزدى. كينو ەكى جىل بويى ءتۇسىرىلدى. فيلمنىڭ ءتۇسىرىلىمى اياقتالدى. قازىر مونتاجداۋ جۇمىستارى ءجۇرىپ جاتىر. بيىل جىلدىڭ سوڭىنا دەيىن كورسەتەيىك دەپ ەدىك، كىشكەنە ۇلگەرمەي جاتىر. ءوزى تۋعان اقمولا وبلىسىنىڭ جەرىنەن بۇكىل جەر شارىن ارالاپ، ۇلكەن جەتىستىكتەرگە جەتكەنىن كورسەتتىك. سونىمەن قاتار، ءوزىڭىز ايتقانداي، ءومىرىنىڭ سوڭىندا وتان سوعىسى كەزىندە ءوزىنىڭ قارجىسىنىڭ ءبارىن بەرىپ، ءوزىنىڭ اتىنداعى ۇشاقتى جاساعانعا دەيىنگى تاعدىرىنىڭ بەلەستەرىن ءبارىن كورسەتتىك. مەنىڭ ويىمشا فيلم جاقسى شىعۋى كەرەك»، - دەدى اقتوتى رايىمقۇلوۆا.
ءمينيستردىڭ ورىنباسارى نۇرقيسا داۋەشوۆتىڭ ايتۋىنشا، جاڭا تۋىندا، تۇزەلىپ- كۇزەلىپ بارىپ، كەلەسى جىلى كورەرمەنگە جول تارتپاق.
«كينو ءبىتتى. قاناعات مۇستافين دەگەن جاس رەجيسەرىمىز جاساپ شىقتى. قازىرگى تاڭدا مۇنى ارنايى زاڭ بويىنشا ۇلتتىق كينونى قولداۋ ورتالىعىنداعى ساراپتامالىق كوميسسياعا وتكىزدىك. ولار قازىر قابىلداپ جاتىر. كينو دەگەن شىعارماشىلىق دۇنيە. سوندىقتان دا كەيبىر جەتپەيتىن جەرلەرىن مونتاجداۋ جۇمىستارى، باسقا دا ماسەلەلەرى بولادى. الداعى جىلى ونىڭ ساپالى بولىپ شىعۋى ءۇشىن مينيسترلىك تاراپىنان دا ۇلكەن قاداعالاۋ جاسايمىز»، - دەدى ۆيتسە- مينيستر.
اۆتور: ەسىمجان ناقتىباي
