اسقار اقايەۆقا جاڭا ايىپ تاعىلدى
جاقىندا اقايەۆتىڭ ارىپتەسى بەكبولوت تالعاربەكوۆ بۇرىنعى مەملەكەت باسشىسىنان بارلىق ايىپتاۋ الىپ تاستالعانىن جانە وعان قاتىستى قىلمىستىق ءىس قىلمىس قۇرامىنىڭ بولماۋىنا بايلانىستى توقتاتىلعانىن مالىمدەدى.
قىرعىزستاننىڭ ۇلتتىق قاۋىپسىزدىك كوميتەتىنىڭ باسپا ءسوز قىزمەتى بۇگىن، 21- جەلتوقساندا تالعاربەكوۆتىڭ ءسوزىن جوققا شىعاردى.
«جەكەلەگەن تۇلعالاردىڭ بۇرىنعى پرەزيدەنت اسقار اقايەۆتىڭ «ءقۇمتور» ءىسى بويىنشا ايىپتاۋلارىن الىپ تاستاۋعا قاتىستى جالعان مالىمدەمەسىنە بايلانىستى ۇ ق ك قوعامعا وسى قىلمىستىق ءىستى تەرگەۋدىڭ الدىن الا ناتيجەلەرى تۋرالى وبەكتيۆ اقپارات جەتكىزۋدى قاجەت دەپ سانايدى. تەرگەۋگە قاتىسى جوق جانە سايكەسىنشە ءىس بويىنشا سەنىمدى اقپاراتى جوق ادامداردىڭ مۇنداي مالىمدەمەسى قوعامدى ادەيى اداستىرادى»، - دەپ ءتۇسىندىردى دەپارتامەنت وكىلى.
سونىمەن قاتار، اسقار اقايەۆقا 1992-جىلى «كامەكو» كومپانياسىمەن باس كەلىسىم جاساسۋ جانە 2003-جىلى «ءقۇمتور» جوباسىن قايتا قۇرىلىمداۋ ەپيزودتارى بويىنشا جاڭا ايىپ تاعىلعان.
«اسقار اقايەۆ قىلمىستاردى جاساعانى ءۇشىن ءوز كىناسىن تولىق مويىنداعانىن جانە تەرگەۋمەن بەلسەندى تۇردە ىنتىماقتاساتىنىن، ال ونىڭ ەلدەن تىس جەرگە كەتۋى تەرگەۋشىمەن، سونداي-اق ونىڭ بىشكەككە كەلۋىمەن الدىن الا كەلىسىلەتىنىن ەرەكشە اتاپ وتكەن ءجون. بۇل رەتتە قىلمىستىق ءىستى تەرگەۋ جالعاسىپ جاتىر جانە «ءقۇمتور» جوباسىن ىسكە اسىرۋعا بايلانىستى قىلمىستاردى جاساۋدىڭ باسقا دا دەرەكتەرى انىقتالادى، ال جۇرگىزىلگەن تەرگەۋ ارەكەتتەرىنىڭ ناتيجەلەرى بويىنشا ءىس فيگۋرانتتارىنا ءتيىستى زاڭدىق باعا بەرىلەدى»، - دەپ تۇيىندەدى ۇ ق ك وكىلى.
