ەكولوگيا ءمينيسترى: قىزمەتتىك كولىگىمدى «ەلەكتروكارعا» اۋىستىرۋعا دايىنمىن

نۇر-سۇلتان. قازاقپارات - ورتالىق كوممۋنيكاتسيالار قىزمەتىندە وتكەن بريفينگىدە ق ر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ نەگە ەكولوگيالىق زاردابى از كولىك پايدالانباي جۇرگەنىن ءتۇسىندىردى، دەپ حابارلايدى قازاقپارات ءتىلشىسى.

«ءسىز ەكولوگيا مينيسترلىگىن قىركۇيەك ايىنان بەرى باسقارىپ كەلەسىز. ءىس جۇزىندە ءۇش اي ۋاقىت ءوتتى. ءبىراق قازاقستاندىقتار جەكە ءوزىڭىز ۇسىنعان «جاسىل» باستامالارىڭىزدى ءالى كورگەن جوق. مىسالى، قىزمەت بارىسىندا گازبەن جۇرەتىن اۆتوكولىك پايدالانۋدى جوسپارلاپ وتىرسىز با؟ نەگە مينيستر ارىپتەستەرىڭىزگە ۇلگى كورسەتپەسكە؟»، - دەپ سۇرادى جيىندا ب ا ق وكىلى.

ۆەدومستۆو باسشىسى بۇل ماسەلە ق ر پرەزيدەنتى ءىس باسقارماسىنىڭ گاراجىنداعى كولىكتەردىڭ تۇرىنە بايلانىستى ەكەنىن ءتۇسىندىردى.

«ءبىزدىڭ مينيسترلىكتىڭ مەنشىگىندە اۆتوكولىك جوق. ءبىز پايدالانىپ جۇرگەن كولىك ق ر پرەزيدەنتىنىڭ ءىس باسقارماسى گاراجىنان جالعا الىنادى. سوندىقتان، ەگەر ولاردا ءسىز ايتقان تالاپتارعا ساي گازبەن جۇرەتىن كولىكتەر بولسا، گازبەن جۇرەتىن كولىككە نەمەسە «ەلەكتروكارعا» كوشۋگە دايىنبىز. ازىرگە ءبىزدىڭ مينيسترلىكتىڭ مەنشىگىندە قىزمەتتىك كولىكتەر جوق»، - دەدى سەرىكقالي برەكەشيەۆ.