ەلوردانى گازداندىرۋ جۇمىسى نەگە باياۋ ءجۇرىپ جاتىر

نۇر- سۇلتان. قازاقپارات - استانا حالقىن تابيعي گازبەن قامتۋ جۇمىسى بىلتىر باستالدى. دەگەنمەن بۇگىن نۇر- سۇلتان قالالىق ءماسليحاتى قوعامدىق كەڭەسىنىڭ وتىرىسىندا بەلگىلى بولعانداي، گازداندىرۋ جۇمىسى باياۋلاعان جانە تۇرعىندار تاراپىنان شاعىم از ەمەس، دەپ حابارلايدى قازاقپارات ءتىلشىسى.

نۇر- سۇلتان قالالىق ءماسليحاتىنىڭ قوعامدىق كەڭەس مۇشەسى باۋىرجان سمايلوۆ ەلوردانى گازداندىرۋ جۇمىسىنىڭ بارىسىن سىنعا الدى.

«گازداندىرۋ جۇمىسىنا قاتىستى حالىق تاراپىنان شاعىم كوپ. اسىرەسە كۇن سۋي باستاعان مەزگىلدە. گاز تارتۋعا جاۋاپتى «قازترانس گاز ايماق» كومپانياسى ۇلگەرمەي جاتىر. بۇگىندە قالا بويىنشا سەرۆيستىك قىزمەتتى ءبىر عانا بريگادا اتقارىپ جاتىر. بۇكىل حالىق ءۇشىن ءبىر عانا سەرۆيستىك قىزمەت، ونىڭ سانىن نەگە كوبەيتپەيدى؟ باسقارما قايدا قاراپ وتىر؟»، - دەدى جيىندا ب. سمايلوۆ.

اتالعان ماسەلەگە قاتىستى قالالىق وتىن- ەنەرگەتيكا كەشەنى جانە كوممۋنالدىق شارۋاشىلىق باسقارما باسشىسىنىڭ ورىنباسارى رۇستەم زاكارين پىكىر ءبىلدىردى.

«سوڭعى 3-4 اي ىشىندە 1 مىڭنان استام ۇيگە گاز تارتىلدى. گاز تارتۋ بويىنشا كەلىپ ءتۇسىپ جاتقان ءوتىنىشتىڭ سانى كۇن ساناپ ارتىپ جاتىر. جانە ەلوردانى گازداندىرۋمەن «قازترانس گاز ايماق» كومپانياسى ەمەس، «ينتەرگاز ورتا ازيا» دەگەن كومپانيا اينالىسادى. گازدى ۇيگە دەيىن جەتكىزۋ - سولاردىڭ مىندەتى. ءسىز ايتقان ماسەلە بويىنشا ءبىز بۇگىندە اتالعان كومپانيانىڭ باسشىلىعىنا ماماندار سانىن ارتتىرۋ تۋرالى ارنايى حات جولدادىق. ياعني، جۇمىس ءونىمدى بولۋى ءۇشىن. ءسىز ايتقان «قازترانس گاز ايماق» - جەكە كومپانيا، اكىمدىككە باعىنبايدى. سەرۆيستىك قىزمەتتى دە كوبىنە جەكە ۇيىمدار جۇرگىزەدى. مەملەكەت، اكىمدىك جەكە كومپانيالاردىڭ ىشكى جۇمىسىنا ارالاسا المايدى. دەگەنمەن ءبىز اۋداندىق اكىمدىكتەرمەن بىرلەسىپ، بۇل ماسەلەنى شەشۋ جاعىن قاراستىرىپ جاتىرمىز. ءوز جۇمىسىن جوسپارعا ساي اتقارىپ جاتقان كومپانيالار بار، كەرىسىنشە جۇمىسى اقساپ جاتقان مەكەمەلەر دە بار»، - دەيدى ر. زاكارين.

اۆتور: ءالي يبرايەۆ