قازاقستاندا بالالار سۋرەتى سالىنعان كوللەكسيالىق مونەتالار شىعارىلدى - فوتو
500 تەڭگەلىك كۇمىستەن، 100 تەڭگەلىك مەلحيوردان جانە نەيزيلبەردەن جاسالعان مونەتالار «قازاقستاننىڭ سالت- داستۇرلەرى، ۇلتتىق ويىندارى» سەرياسىن جالعاستىرادى.
«ءتىلاشار - ءاربىر وتباسى ومىرىندەگى ەرەكشە وقيعا. بۇرىن بۇل ادەت- عۇرىپ بالا العاشقى سوزدەرىن ايتقاننان كەيىن جاسالعان. بۇگىندە ءبىلىم الۋ جولىنداعى العاشقى قادام دەگەندى بىلدىرەدى»، - دەلىنگەن حابارلامادا.
مونەتانىڭ بەت جاعىنىڭ (اۆەرس) ورتالىق بولىگىندە قازاقستاننىڭ مەملەكەتتىك ەلتاڭباسى، اينالدىرا QAZAQSTAN RESPÝBLIKASY • REPUBLIC OF KAZAKHSTAN ، تومەنگى بولىگىندە مونەتالاردىڭ نومينالىن بىلدىرەتىن جازۋ ورنالاسقان.
مونەتانىڭ سىرت جاعىندا (ريەۆەرس) مەكتەپ اتريبۋتى بار بالالار سۋرەتى، مونەتا جاسالعان مەتالدىڭ سىناماسى مەن ماسساسى، سوعىلعان جىلى كورسەتىلگەن جازۋ بار.
مونەتالار:
- 925/1000 سىنامدى كۇمىستەن، ماسساسى - 24 گرام، ساپاسى - proof، نومينالى - 500 تەڭگە، دايىنداۋ تارالىمى - 5000 دانا؛
- م ن 25 مەلحيور قوسپاسىنان، ماسساسى - 15 گرامم، ديامەترى - 33 م م، ساپاسى - brilliant uncirculated، نومينالى - 100 تەڭگە، تارالىمى 30000 دانا؛
- م ن س 15-20 نەيزيلبەر قوسپاسىنان، ماسساسى - 11,17 گرام، ديامەترى - 31 م م، ساپاسى - brilliant uncirculated، نومينالى - 100 تەڭگە، تارالىمى - 100000 دانا بولىپ دايىندالدى.
«كۇمىستەن، مەلحيور قوسپاسىنان جانە نەيزيلبەر قوسپاسىنان جاسالعان مونەتالاردىڭ بەت جانە سىرت جاعىنداعى بەينە بىردەي. كۇمىستەن جاسالعان مونەتالار ءتۇرلى- ءتۇستى ەمال جاعۋ تەحنولوگياسىن قولدانا وتىرىپ جاسالعان، مەلحيوردان جاسالعان مونەتالاردا قۇبىلمالى بەت قاباتىن جاعۋ تەحنولوگياسى قولدانىلعان»، - دەپ ناقتىلادى ۇلتتىق بانك وكىلى.
ۇلتتىق بانك مونەتالاردى ساتۋ قاشان باستالاتىنى تۋرالى اقپاراتتى كەيىنىرەك بەرۋگە ۋادە بەردى.
