الماتىدا ءابىش كەكىلبايەۆتىڭ پوۆەسىمەن تۇسىرىلگەن «شىڭىراۋ» فيلمى تانىستىرىلدى

الماتى. قازاقپارات - الماتىدا جازۋشى ءابىش كەكىلبايەۆتىڭ «شىڭىراۋ» پوۆەسى نەگىزىندە تۇسىرىلگەن اتتاس فيلمنىڭ رەسمي تانىستىرىلىمى ءوتتى، دەپ حابارلايدى قازاقپارات ءتىلشىسى.

«فيلم 10 نان استام حالىقارالىق كينوفەستيۆالدىڭ كونكۋرستىق باعدارلاماسىنا قاتىسىپ باعاسىن العانمەن، ەلدەگى پرەمەراسى پاندەمياعا بايلانىستى كەيىنگە شەگەرىلگەن ەدى. سونىڭ رەتى بۇگىن كەلىپ وتىر. شاراعا قارجىلاي دەمەۋشىلىك كورسەتكەن «قازاقستان كوممەرتسيا» اكسيونەرلىك قوعامى ديرەكتورلار كەڭەسىنىڭ ءتوراعاسى، بەلگىلى مەتسەنات، مەملەكەت جانە قوعام قايراتكەرى جاۋعاشتى جولان ۇلى نابيەۆكە العىس ايتامىز»، - دەيدى جازۋشىنىڭ نەمەرەسى ابىل كەكىلبايەۆ.

فيلمنىڭ سەناريىن رەجيسسەر جاڭابەك جەتىرۋوۆتىڭ ءوزى جازعانىن ايتا كەتۋ كەرەك. نەگىزى پوۆەست 1982-جىلى جارىق كورگەن. سول تۇستان 2009-جىلعا دەيىن بىرنەشە كينو مامانى ونى ەكرانعا شىعارۋعا نيەتتەنگەنىمەن، ءساتى تۇسپەگەن كورىنەدى.

«2009-جىلى «قازاق فيلم» كينوستۋدياسىنىڭ سول كەزدەگى پرەزيدەنتى ەرمەك امانشايەۆتىڭ ۇيىتقى بولۋىمەن ءابىش اتامنىڭ پوۆەسىن ەكرانعا شىعارۋ بويىنشا ناقتى جۇمىس باستالدى. بۇل جۇمىس جاڭابەك جەتىرۋوۆقا تاپسىرىلدى.

ول كىسى پوۆەست اۆتورىمەن بىرنەشە رەت كەزدەسىپ، سەناريدىڭ العاشقى نۇسقاسىن وزىنە ماقۇلداتقان بولاتىن. وكىنىشكە قاراي، اتامىز فيلمدى ءتۇسىرۋ جۇمىستارى باستالعانىن كورمەي كەتتى. 2019 -جىلى استانادا «ەۋرازيا» حالىقارالىق كينوفەستيۆالىنىڭ باعدارلاماسىندا «شىڭىراۋ» فيلمى العاش رەت كورسەتىلدى»، - دەيدى ءابىش كەكىلبايەۆتىڭ نەمەرەسى.

فيلمدەگى سيۋجەت جەلىسى ءۇستىرت جازىعىندا قۇدىق قازۋدى كاسىپ ەتكەن ەكى قاراپايىم قۇدىقشىنىڭ اراسىنداعى باسەكەگە قۇرىلعان. ەلدىڭ باتاسىن الۋدى ماقسات تۇتقان بايىرعى كاسىپتى باسەكەنىڭ كوزىنە اينالدىرعان ەڭسەپ اقىرى سول باقتالاستىقتىڭ قۇربانىنا اينالادى.

«فيلم ادامنىڭ ءوز ماقساتىنا جەتۋ ءۇشىن ءومىر باقي ەڭبەكتەنەتىنىن، ءبىراق ول ءوز مۇمكىندىگىنىڭ قاي جەردە سارقىلاتىنىن سەزبەي، شەكتەن اسىپ كەتىپ، ءوز ارمانىنىڭ قۇربانىنا اينالاتىنىن كورسەتەدى»، - دەيدى ابىل كەكىلبايەۆ.

بۇل فيلم 2019-جىلدان بەرى 10 نان استام حالىقارالىق فەستيۆالگە قاتىسقان. سونىڭ ەڭ نەگىزگىلەرى - 2019-جىلى يراندا وتكەن 37-«فادجر» حالىقارالىق كينوفەستيۆالىنىڭ، قىتايدىڭ سيامەن قالاسىندا وتكەن «التىن اتەش جانە ءجۇز گۇل» حالىقارالىق كينوفەستيۆالىنىڭ، ءۇندى ەلىندە وتكەن 24-«كەرالا» حالىقارالىق كينوفەستيۆالىنىڭ بولگاريانىڭ سوفيا قالاسىندا وتكەن 13- «MENAR» حالىقارالىق كينوفەستيۆالىنىڭ جانە سانكت-پەتەربۋرگتە وتكەن 27- «ادەبيەت جانە كينو» اتتى حالىقارالىق كينوفەستيۆالدىڭ نەگىزگى كونكۋرستىق باعدارلاماسىندا ۇسىنىلدى. سونداي-اق، ا ق ش- تىڭ اريزونا قالاسىندا ۇيىمداستىرىلعان ازيالىق فيلمدەردىڭ حالىقارالىق كينوفەستيۆالىندە، ءۇندى مەملەكەتىنىڭ بىرنەشە قالالارىندا كورسەتىلگەن.

تۋىندىنىڭ اكتەرلىك قۇرامىنا كەلسەك، نەگىزگى رولدەردى قازاقستاننىڭ ەڭبەك سىڭىرگەن قايراتكەرى الدابەك شالبايەۆ، بەلگىلى تەاتر جانە كينو اكتەرى مۇحامەدجان مىرزاكەيەۆ، «دارىن» جاستار سىيلىعىنىڭ يەگەرى اسىلحان تولەپوۆ، ماقسات ءسابيتوۆ، قانات قۇرىمبايەۆ، ايجان جاڭابەك قىزى، انار بەيسەنبينا سياقتى ارتىستەر سومداعان.