اتىراۋ وبلىسىندا جەراستى سۋ قورىنا بارلاۋ جۇرگىزىلەدى

نۇر- سۇلتان. قازاقپارات - اتىراۋ وبلىسىندا جەراستى سۋ قورلارىنا بارلاۋ جۇرگىزىلەدى. بۇل جايىندا ق ر پرەمەر- ءمينيسترىنىڭ ورىنباسارى رومان سكلياردىڭ ءماجىلىس دەپۋتاتتارى ساۋالىنا بەرگەن جاۋابىندا ايتىلعان، دەپ حابارلايدى قازاقپارات ءتىلشىسى.

«جايىق وزەنىنەن سۋ تۇتىنۋدى پايدالانۋدى ازايتۋ ءۇشىن سۋمەن جابدىقتاۋدىڭ جەراستى كوزدەرىنە كەزەڭ- كەزەڭىمەن كوشۋ تۋرالى شەشىم قابىلداندى. باتىس قازاقستان وبلىسىندا سۋ تاپشىلىعىن بولدىرماۋ جانە حالىقتى تۇراقتى سۋمەن جابدىقتاۋدى قامتاماسىز ەتۋ ماقساتىندا بيىل تاۋلىگىنە 1000 تەكشە مەتر تومەن كولەممەن 16 ۇڭعىمانى قالپىنا كەلتىرۋ جۇمىسى جۇرگىزىلدى» دەلىنگەن رومان سكلياردىڭ جاۋابىندا.

سونىمەن قاتار ۆيتسە- پرەمەر 2015-2021 -جىلدار ارالىعىندا 224 ەلدى مەكەننىڭ جەراستى سۋ قورى بارلانىپ، 13 كەن ورنىنا قايتا باعالاۋ جۇمىسى جۇرگىزىلگەنىن ايتادى.

«بۇل رەتتە 2022-2024 -جىلدار ارالىعىندا ەلدى مەكەندەردى جەراستى سۋىمەن قامتاماسىز ەتۋ ءۇشىن 7 كەن ورنىنىڭ قورىن قايتا باعالاۋ جۇمىسى جوسپارلانعان. سونداي- اق، اتىراۋ وبلىسى قىزىلقوعا اۋدانىنداعى شىعىس تايسويعان جەر استى سۋ قورىنان سۋ الۋ ءۇشىن قوسىمشا ىزدەستىرۋ- بارلاۋ جۇمىسىن جۇرگىزۋ كوزدەلىپ وتىر»، - دەيدى رومان سكليار.

اۆتور: مارلان جيەمباي