مەملەكەتتىك قۇپيا قۇجاتتار قالاي جەتكىزىلەدى

نۇر-سۇلتان. قازاقپارات - بۇگىن ەلىمىزدە فەلدەگەرلىك قىزمەت ماماندارى ءتول مەرەكەلەرىن اتاپ وتۋدە.

اتالعان قىزمەتتىڭ مەملەكەتتىك ماڭىزى زور. ولاي بولسا فەلدەگەر دەگەن كىم؟ ونىڭ مىندەتى قانداي؟ فەلدەگەر بولۋ ءۇشىن قانداي قاسيەت تالاپ ەتىلەدى؟

وسى جانە وزگە دە سۇراقتارعا ق ر مەملەكەتتىك فەلدەگەرلىك قىزمەتى تۇركىستان وبلىسى بويىنشا باسقارما باسشىسى ساپارعالي ءسابيتوۆ جاۋاپ بەردى، دەپ حابارلايدى قازاقپارات ءتىلشىسى.

«ءبىزدىڭ مىندەت - مەملەكەتتىك ماڭىزدى، قۇپيا قۇجاتتاردى جەتكىزۋ. كۇنىنە 3-4 مىڭ قۇجات تاسيمىز. ياعني قۇجات ءتيىستى جەرگە ۋاقىتىلى ءارى بۇتىندەي جەتۋى ءتيىس. بۇل كوماندالىق جۇمىس جانە جۇمىسقا كىرىسەر الدىندا نۇسقاۋلىق بەرىلەدى. ويتكەنى، جاۋاپكەرشىلىك جوعارى، فەلدەگەرلەر بىرەۋدىڭ جەكە زاتىن ەمەس، مەملەكەتتىك قۇپيا سانالاتىن قۇجاتتى جەتكىزەدى. سوندىقتان ءبىز توتەنشە جاعدايعا دايىن بولۋىمىز كەرەك. ءبىزدىڭ قىزمەتكەرلەر اپتاسىنا 2 رەت ارنايى دايىندىقتان وتەدى»، - دەدى ساپارعالي ءسابيتوۆ.

سونداي-اق، باسقارما باسشىسى فەلدەگەرلەرگە قويىلاتىن باستى تالاپتارعا توقتالىپ ءوتتى. «فەلدەگەردىڭ جوعارى ءبىلىمى بولۋى قاجەت. اتاپ ايتقاندا زاڭ سالاسى بويىنشا. مامان وزىنە جۇكتەلگەن مىندەتكە اسا جاۋاپكەرشىلىكپەن قاراۋى ءتيىس. ودان بولەك، ادام مورالدىق جانە فيزيكالىق تۇرعىدان كەز كەلگەن جاعدايعا دايىن بولۋى كەرەك. ويتكەنى، جولدا ءتۇرلى جاعداي بولۋى مۇمكىن، ال ول قۇجاتتى امان ساۋ جەتكىزۋى - مىندەت. ارينە، جەتكىزۋ پروتسەسى جوعارى باسشىلىق ارقىلى باقىلانادى. وسى كۇنگە دەيىن ءبىزدىڭ ماماندار ءوز مىندەتتەرىن مۇلتىكسىز اتقارىپ كەلەدى»، - دەيدى ول.

ونىڭ ايتۋىنشا، فەلدەگەرلىك قىزمەت تىكەلەي مەملەكەتتىك ورگاندارمەن جۇمىس ىستەيدى. ونىڭ ىشىندە ۇكىمەت، ىشكى جانە سىرتقى ىستەر مينيسترلىگى تاعى سول سياقتى.

«مەن بۇل سالاعا 1980 -جىلى كەلىپ، 2017 -جىلعا دەيىن ەڭبەك ەتىپ، زەينەتكە شىقتىم. وعان دەيىن ميليتسيا بولىپ جۇمىس ىستەدىم. ءبىز پرەزيدەنتتىڭ، ۇكىمەتتىڭ قۇجات، حاتتارىن تاسيمىز. ياعني قۇجات الدىمەن ماسكەۋگە جەتكىزىلەدى، ودان ءارى شەتەل اسادى. نەگە ماسكەۋ ارقىلى دەسەڭىز؟ تىكەلەي جەتكىزۋ قىمباتقا تۇسەدى. ەلىمىزدە فەلدەگەرلىك قىزمەت قۇرىلىپ، جۇمىسىن باستاعالى جول- جونەكەي قۇجات جوعالۋ نەمەسە ۋاقىتىلى جەتپەۋ وقيعاسى بولعان ەمەس»، - دەيدى ارداگەر فەلدەگەر شاپحات بيساليەۆ. بۇعان دەيىن حابارلاعانىمىزداي بۇگىن ەلوردادا فەلدەگەرلىك قىزمەت ماماندارى ماراپاتتالدى.