الماتىدا جارىسقان اۆتوبۋس جۇرگىزۋشىسى جازالاندى - ۆيدەو

نۇر-سۇلتان. قازاقپارات – الماتىدا جول ەرەجەسىن ورەسكەل بۇزعان جولاۋشىلار اۆتوبۋسىنىڭ جۇرگىزۋشىسى جاۋاپقا تارتىلدى.

بۇل تۋرالى قالالىق پوليتسيا دەپارتامەنتى باستىعىنىڭ ورىنباسارى رۇستەم ءابدىراحمانوۆ Instagram-دا مالىمدەدى، - دەپ حابارلايدى Tengrinews.kz ءتىلشىسى.

جاقىندا الەۋمەتتىك جەلىدە №71-باعىتىنداعى اۆتوبۋس جۇرگىزۋشىسى باسقا اۆتوبۋستى باسىپ وزۋ ءۇشىن جول ەرەجەسىن ورەسكەل بۇزىپ، كەيىن ونىڭ جولىن جاۋىپ تاستاعانى تۋرالى ۆيدەو تاراعان بولاتىن.

«ول نە ىستەپ ءجۇر؟ ەكەۋى بايگە ۇيىمداستىرىپ ءجۇر مە؟ مىناۋ قوعامدىق كولىك قوي، ىشىندە تولعان ادام»، - دەيدى ۆيدەونى ءتۇسىرىپ تۇرعان ادام.

ءتارتىپ بۇزعان جۇرگىزۋشى 1962 -جىلى تۋعان ازامات بولىپ شىقتى. مىناداي اكىمشىلىك قۇقىقبۇزۋشىلىقتاردى جاساعانى ءۇشىن جاۋاپكەرشىلىككە تارتىلدى:

595-باپتىڭ 1-بولىگى (جول ءجۇرىسى قاعيدالارىنىڭ ءجۇرۋ، قايتا اۋىستىرۋ، بۇرىلۋ، كەرى بۇرىلۋ نەمەسە توقتاۋ الدىنداعى سيگنال بەرۋ تالابىن ورىنداماۋ - بەس ايلىق ەسەپتىك كورسەتكىش مولشەرىندە ايىپپۇل سالۋعا اكەپ سوعادى)؛

596-باپتىڭ 3-بولىگى (ەگەر بۇل جول ءجۇرىسى قاعيدالارىندا تىيىم سالىنعان جاعدايلاردا، جولدىڭ ءجۇرۋ بولىگىنىڭ قارسى باعىتتا جۇرۋگە ارنالعان جاعىنا، ونىڭ ىشىندە كەرى بۇرىلىپ نەمەسە بۇرىلىس جاساپ شىعۋ - التى اي مەرزىمگە كولىك قۇرالدارىن باسقارۋ قۇقىعىنان ايىرۋعا اكەپ سوعادى)؛

606-باپتىڭ 1-بولىگى (جول جۇرىسىنە قاتىسۋشىنىڭ اۆاريالىق جاعداي تۋعىزۋعا اكەپ سوققان، ياعني جول جۇرىسىنە باسقا دا قاتىسۋشىلاردى ءجۇرۋ جىلدامدىعىن، باعىتىن كۇرت وزگەرتۋگە ءماجبۇر ەتىپ، جول ءجۇرىسى قاعيدالارىن بۇزۋى - ون ايلىق ەسەپتىك كورسەتكىش مولشەرىندە ايىپپۇل سالۋعا اكەپ سوعادى).