تۇمان، كوكتايعاق: دۇيسەنبى كۇنگە اۋا رايى بولجامى

نۇر- سۇلتان. قازاقپارات – 20-جەلتوقساندا ەلىمىزدىڭ باسىم بولىگىندە قۇبىلمالى اۋا رايى ساقتالادى - جاڭبىر مەن قار تۇرىندە جاۋىن- شاشىن كۇتىلەدى، تۇندە ەلدىڭ وڭتۇستىگىنىڭ تاۋلى اۋداندارىندا قاتتى جاۋىن- شاشىن، نايزاعاي بولجانادى.

رەسپۋبليكانىڭ كەي جەرلەرىندە جەل كۇشەيىپ، تۇمان، كوكتايعاق، جاياۋ بۇرقاسىن بولادى. قازاقپارات بۇل تۋرالى «قازگيدرومەتكە» سىلتەمە جاساپ حابارلايدى.

جامبىل وبلىسىنىڭ وڭتۇستىك- باتىسىندا 15-20 م/س جەل تۇرادى، تۇندە ەكپىنى 23-28 م/س، كەيدە 30 م/س جانە ودان جوعارى ارتادى. ءوڭىردىڭ تاۋلى جانە تاۋ بوكتەرلى اۋداندارىندا تۇمان، كوكتايعاق كۇتىلەدى.

تۇندە جانە تاڭەرتەڭ تۇركىستان وبلىسىنىڭ باتىسىندا، وڭتۇستىگىندە، تاۋلى جانە تاۋ بوكتەرلى اۋداندارىندا نايزاعاي، تۇمان بولادى. تاۋدى اۋدانداردا جەل 15-20 م/س كۇشەيەدى، تۇندە 23-28 م/س ارتادى.

اقمولا وبلىسىنىڭ سولتۇستىك- باتىسىندا، وڭتۇستىك- شىعىسىندا تۇمان، كوكتايعاق، جاياۋ بۇرقاسىن كۇتىلەدى. ءوڭىردىڭ سولتۇستىك- باتىسىندا جەل 15-20 م/س جەتەدى.

سولتۇستىك قازاقستان وبلىسىنىڭ سولتۇستىگىندە، باتىسىندا، شىعىسىندا جاياۋ بۇرقاسىن، تۇمان، كوكتايعاق بولادى. كۇندىز ءوڭىردىڭ باتىسىندا جەل 15-20 م/س سوعادى.

تۇندە پاۆلودار وبلىسىنىڭ وڭتۇستىگىندە جەل 15-20 م/س ارتادى. جاياۋ بۇرقاسىن، تۇمان، كۇندىز باتىسى مەن وڭتۇستىگىندە كوكتايعاق بولادى.

شىعىس قازاقستان وبلىسىنىڭ باتىسىندا، ورتالىعىندا جەل 15-20 م/س كۇشەيەدى. جاياۋ بۇرقاسىنمەن سوعىپ، كوكتايعاق بولادى. تۇندە قاراعاندى وبلىسىندا كوكتايعاق، جاياۋ بۇرقاسىن بولجانادى.

تۇندە اقتوبە وبلىسىنىڭ سولتۇستىك- باتىسىندا، وڭتۇستىگىندە جانە شىعىسىندا كوكتايعاق بولادى. كۇندىز وبلىستىڭ سولتۇستىك- باتىسىندا 15-20 م/س جەل تۇرادى.

قوستاناي وبلىسىنىڭ سولتۇستىگىندە، وڭتۇستىگىندە تۇمان، كوكتايعاق كۇتىلەدى، 15-20 م/س جەل تۇرادى.

باتىس قازاقستان وبلىسىنىڭ سولتۇستىگىندە، سولتۇستىك- باتىسىندا كوكتايعاق، تۇمان، جاياۋ بۇرقاسىن بولجانادى. ءوڭىردىڭ باتىسىندا، سولتۇستىگىندە جەل 15-20 م/س كۇشەيەدى.

ماڭعىستاۋ وبلىسىنىڭ باتىسىندا تۇمان، كوكتايعاق، 15-20 م/س ەكپىندە جەل، شاڭدى داۋىل كۇتىلەدى.

اتىراۋ وبلىسىنىڭ وڭتۇستىك- شىعىسىندا تۇمان تۇرادى. ءوڭىردىڭ باتىسىندا 15-20 م/س جەل كۇشەيەدى.

قىزىلوردا وبلىسىنىڭ سولتۇستىگىندە، ورتالىعىندا تۇمان، كوكتايعاق بولادى. الماتى وبلىسىنىڭ باتىسىندا، وڭتۇستىگىندە، شىعىسىندا 15-20 م/س جەل تۇرادى.