ا ق ش قازاقستاندى دوس دەپ ماقتانىشپەن اتايدى - مەملەكەتتىك حاتشى ەنتوني بلينكەن
قازاقپارات بۇل تۋرالى ق ر سىرتقى ىستەر مينيسترلىگىنە سىلتەمە جاساپ حابارلايدى.
«امەريكا قۇراما شتاتتارىنىڭ اتىنان قازاقستان حالقىن 2021 -جىلعى 16- جەلتوقسانداعى قازاقستان تاۋەلسىزدىگىنىڭ 30 جىلدىعىمەن قۇتتىقتايمىن. ا ق ش قازاقستاننىڭ ەكونوميكالىق بايلانىستاردى نىعايتۋ، وركەندەۋ مەن ءوسۋدى ىلگەرىلەتۋ بويىنشا كۇش- جىگەرىن، سونداي- اق حالىقارالىق بەيبىتشىلىك پەن قاۋىپسىزدىككە قوسقان زور ۇلەسىن جوعارى باعالايدى. قازاقستان سوڭعى وتىز جىل ىشىندە ورتالىق ازياداعى وزگەرىستەردىڭ ورتالىعىندا بولدى. ول يادرولىق قارۋدى تاراتپاۋعا دەگەن بەرىك ۇستانىمىمەن ءوزىن باسقا ەلدەرگە ۇلگى ەتىپ كورسەتتى جانە ءبىز، جۇرگىزىلىپ جاتقان ساياسي جانە ادام قۇقىقتارى سالاسىنداعى رەفورمالارمەن شابىتتىمىز. امەريكا قۇراما شتاتتارى قازاقستاندى بىرىككەن ۇلتتار ۇيىمىنىڭ ادام قۇقىقتارى جونىندەگى كەڭەسىنە سايلانۋىمەن قۇتتىقتايدى. ءبىز سونداي- اق قازاقستاننىڭ جاڭارتىلاتىن ەنەرگيا كوزدەرىن پايدالانۋدى كەڭەيتۋ جانە شەتەلدىك ينۆەستيتسيالار ءۇشىن كليماتتى جاقسارتۋ جونىندەگى كۇش- جىگەرىن قولدايمىز»، - دەلىنگەن امەريكا مەملەكەتتىك حاتشىسىنىڭ قۇتتىقتاۋىندا.
سونداي- اق ە. بلينكەن ا ق ش ەلىمىزدى دوس رەتىندە ماقتانىشپەن ايتاتىنىن جەتكىزدى.
«امەريكا قۇراما شتاتتارى قازاقستاندى دوس دەپ ماقتانىشپەن اتايدى جانە ونىڭ ەگەمەندىگى، تاۋەلسىزدىگى مەن اۋماقتىق تۇتاستىعىنا بەرىكپىز. ءبىز ەكى ەل ازاماتتارىنىڭ يگىلىگى ءۇشىن ستراتەگيالىق سەرىكتەستىكتى ودان ءارى نىعايتا بەرەمىز»، - دەدى ول.
