قاسىم- جومارت توقايەۆ تاۋەلسىزدىكتىڭ ءتورتىنشى ونجىلدىعىنداعى مەجەلەردى اتادى
«تاريحي ۋاقىت ولشەمىمەن قاراعاندا 30 جىل دەگەن - قاس- قاعىم ءسات. ال، وتكەن وقيعالار تۇرعىسىنان باعالاساق، عاسىرلارعا تاتيتىن مەرزىم. قازاقستان حالقى ءۇشىن بۇل - ازاتتىق جىلناماسىنىڭ تۇتاس ءداۋىرى. جارقىن بولاشاعىمىزعا جول سالعان ۇلى جەتىستىكتەر كەزەڭى. ەندى تاۋەلسىزدىكتىڭ ءتورتىنشى ونجىلدىعىنا قادام باسقالى تۇرمىز. بۇل كەزەڭ بىزگە جاڭا مىندەتتەر جۇكتەيدى. مەملەكەتتىگىمىزدى ودان ءارى نىعايتىپ، حالقىمىزدىڭ ءال- اۋقاتىن ارتتىرا ءتۇسۋىمىز كەرەك. سوندىقتان، بارلىق سالاداعى رەفورمانى جالعاستىرا بەرەمىز»، - دەدى پرەزيدەنت.
سونداي- اق، قاسىم- جومارت توقايەۆ ەندىگى بۋىننىڭ مىندەتى تاۋەلسىزدىكتى قورعاپ، نىعايتۋ ەكەنىن ەسكە سالدى.
«ەڭ باستىسى، بەيبىت ءومىردى، تىنىشتىق پەن تۇراقتىلىقتى ساقتاي ءبىلۋىمىز قاجەت. سوندا ازاماتتارىمىز تاۋەلسىزدىكتىڭ يگىلىگىن ءاردايىم سەزىنەتىن بولادى. ءبىزدىڭ ماقساتىمىز - وسى. بابالارىمىز عاسىرلار بويى تاۋەلسىزدىككە جەتۋ ءۇشىن كۇرەسسە، ەندىگى ۇرپاق تاۋەلسىزدىكتى قورعاپ، نىعايتۋ ءۇشىن كۇرەسەدى. ءبىز بۇگىنگى ەلدىك ىستەردى جاستارعا اماناتتايمىز. قازىرگى اۋقىمدى جۇمىستىڭ ءبارى جارقىن بولاشاق ءۇشىن جاسالۋدا. ەگەمەندىك كەزەڭىندە ويى ازات، رۋحى بيىك تاۋەلسىزدىك پەرزەنتتەرى ءوسىپ- جەتىلدى. شىن مانىندە، ولاردىڭ الەۋەتى وتە زور، مۇمكىندىكتەرى وراسان. وسكەلەڭ ۇرپاق اعا بۋىننىڭ تاجىريبەسىن پايدالانىپ، ءۇمىتىن اقتايدى دەپ سەنەمىن»، - دەدى مەملەكەت باسشىسى.
قاسىم- جومارت توقايەۆ وسكەلەڭ ۇرپاققا اعا بۋىننىڭ تاجىريبەسىن ءۇمىتىن اقتاۋى ءۇشىن نە ىستەۋى كەرەكتىگىن ايتتى.
«وسكەلەڭ ۇرپاق اعا بۋىننىڭ تاجىريبەسىن پايدالانىپ، ءۇمىتىن اقتايدى دەپ سەنەمىن. جولدارىڭىز كەدىر- بۇدىرسىز بولمايدى. سوندىقتان، كوپ ءبىلىم الىپ، رۋحاني جاعىنان بايىپ، ناعىز ازامات رەتىندە قالىپتاسۋ كەرەك. ۋاقتى تىنىسىن ءدوپ باسىپ، زامان تالابىنا بەيىمدەلە بىلگەن جۇرت ەشقاشان ۇتىلمايدى. كەز كەلگەن سىناققا دايىن تۇرادى. ءبىز كۇش- قۋاتى مەن قارىم- قابىلەتى ساي كەمەل حالىق بولۋىمىز كەرەك. كۇندە وزگەرىپ جاتقان قۇبىلمالى كەزەڭدە بۇل ماقساتقا جەتۋ كۇردەلى ەكەنى انىق»، - دەدى مەملەكەت باسشىسى.
پرەزيدەنتتىڭ پايىمىنشا، قازىر الەمگە تۇراقسىزدىق فاكتورلارى اسەر ەتىپ تۇر.
«ونىڭ ۇستىنە پاندەمياعا بايلانىستى جاڭا سىن- قاتەرلەر پايدا بولۋدا. ءبىراق جۇرتىمىز قيىندىقتىڭ ءبارىن ەڭسەرە الاتىنىنا سەنىمىم زور. سەبەبى تۇعىرى مىزعىماس مىقتى مەملەكەتىمىز بار. دامۋ جولىمىزدى ناقتى نۇسقاپ تۇرعان ستراتەگيالىق ماقساتتارىمىز بار. ەلىمىز ءوزىنىڭ سارا جولىنان اينىماي العا قادام باسا بەرەدى. ءبىز ءۇشىن تاۋەلسىزدىك بارىنەن قىمبات. باعا جەتپەس قۇندىلىعىمىزدى قاستەرلەپ، قۋاتتى قازاقستاندى دامىتۋ ءۇشىن ءبارىمىز جۇمىلىپ، ءبىر ەل بولىپ ايانباي ەڭبەك ەتەيىك. جالپىۇلتتىق مەرەيتويىمىز قۇتتى بولسىن! ەلىمىزدىڭ ابىرويى اسقاقتاپ، بەدەلى بيىكتەي بەرسىن! ەلباسىمىز امان بولسىن! قازاقستانىمىز ماڭگى بولسىن»، - دەپ تۇيىندەدى قاسىم- جومارت توقايەۆ.
اۆتور: ەسىمجان ناقتىباي
