قازاق وتباسىنا كەلىن بولعان سوڭ، سالت- ءداستۇردى ساقتايمىن - يرينا سيلچەنكو

اقتاۋ. قازاقپارات - ماڭعىستاۋ وبلىسىنىڭ تۋماسى يرينا سيلچەنكونىڭ ۇلتى ورىس، دەگەنمەن قازاق ءتىلىن جاقسى مەڭگەرگەن جانە قازاق جىگىتىنە تۇرمىسقا شىققان.

بۇگىندە ول ۇستازدىق ەتىپ، وسكەلەڭ ۇرپاققا ورىس ءتىلى مەن ادەبيەتى ءپانىن ۇيرەتەدى. يرينا قازاقپارات تىلشىسىنە سۇحبات بارىسىندا قازاق ءتىلىن ۇيرەنۋدىڭ قاراپايىم تاسىلدەرى تۋرالى ايتىپ بەردى.

«مەن ماڭعىستاۋ وبلىسى بەينەۋ اۋدانىندا دۇنيەگە كەلدىم. ۇلتىم ورىس، ياعني اكەم - ورىس، انام - قازاق. جاسىم - 24-تە. بەينەۋ ورتا مەكتەبىن ءبىتىرىپ، وسىنداعى ەكونوميكالىق- گۋمانيتارلىق كوللەدجىنە ءتۇستىم. سودان سوڭ تاراز مەملەكەتتىك ۋنيۆەرسيتەتىندە جوعارى ءبىلىم الدىم. ماماندىعىم ورىس ءتىلى مەن ادەبيەتى ءپانىنىڭ مۇعالىمى. قازىرگى تاڭدا اقتاۋ قالاسىنداعى №20 ورتا مەكتەپتە قازاق سىنىپتارى ءۇشىن ورىس ءتىلى مەن ادەبيەتى پانىنەن ساباق بەرەمىن. ۇستازدىق جولدا جۇرگەنىمە 6- جىلعا قاراپ بارادى. مەكتەپتە ورىسشا وقىدىم، ودان كەيىنگى ءبىلىمدى قازاق تىلىندە الدىم. وسكەن ورتام قازاقي بولعاندىقتان، قازاق ءتىلىن بالا كۇنىمنەن ەركىن بىلەمىن. ونىڭ ۇستىنە قازاق جىگىتىنە تۇرمىسقا شىققانمىن، قازىر ءبىر بالامىز بار»، - دەدى يرينا سيلچەنكو.

سونداي- اق جاس مامان قازاق ءتىلىن ۇيرەنگىسى كەلەتىن جاندارعا كەڭەسىن ۇسىندى.

«مەنىمەن كوپ ادامدار الدىمەن ورىسشا سويلەپ باستايدى. مەن قازاقشا جاۋاپ بەرگەن سوڭ، تاڭعالىپ، اڭگىمەنى قازاق تىلىندە جالعاستىرىپ جاتادى. جالپى ءتىل ۇيرەنۋدە، ونىڭ ىشىندە قازاق تىلىنە دە قاتىستى باستىسى، نيەت بولۋ كەرەك، ءتىلدى جۇرەكتىڭ قالاۋىمەن ۇيرەنۋ قاجەت. ال بۇگىندە ءتىلدى ۇيرەنۋدىڭ ءادىس- ءتاسىلى جەتىپ جاتىر. نەشەتۇرلى كۋرستار بار، قازاقي ورتامەن ارالاسۋ ارقىلى، فيلم قاراپ، قازاقشا اۋەن تىڭداۋ ارقىلى، سونداي- اق كىتاپ وقۋ ارقىلى دا ۇيرەنۋگە بولادى»، - دەيدى ول.

ودان بولەك، اقتاۋلىق يرينا سيلچەنكو وبلىستىق «ءتىل تاتۋلىق تىرەگى» جانە رەسپۋبليكالىق «ءتىل پاراسات» بايقاۋلارىنىڭ جەڭىمپازى.

«قازاق ءتىلىن ءبىلۋىمنىڭ ارقاسىندا ءبىراز جەرلەرگە شاقىرتۋ الىپ، ءىس- شارالارعا قاتىسىپ ءجۇرمىن. سونداي- اق ب ا ق تاراپىنان دا قىزىعۋشىلىق باسىم، سۇحبات الىپ، ءتۇرلى تەلەباعدارلامالارعا شاقىرىپ جاتادى. سول سياقتى «مەن قازاقشا سويلەيمىن» رەسپۋبليكالىق اكسياعا قاتىسىپ، 200 ادامنىڭ ىشىنەن 15 ۇزدىك قاتىسۋشىنىڭ ءبىرى اتاندىم»، - دەيدى جاس مامان.

ونىڭ ايتۋىنشا، كەلىن بولىپ تۇسكەندە قازاقتىڭ سالت- ءداستۇرىن ۇيرەنۋ قيىندىققا تۇسپەگەن. «ارينە، قازاق وتباسىنا كەلىن بولعان سوڭ، سالت- ءداستۇردى بىلەمىن جانە ساقتايمىن. ول جاعىنان ەش قيىندىق بولعان جوق. ونىڭ ۇستىنە ءوز انام قازاق، ول دا بار بىلگەنىن ۇيرەتتى. بالا كۇنىمنەن قازاقتىڭ تالاي توي- دۋمانىنا بارىپ ءجۇرمىن، ياعني كورىپ، ءبىلىپ وسكەنمىن»، - دەدى اقتاۋلىق جەرلەسىمىز.

اۆتور: ءالي يبرايەۆ