قازاقستاندا وتەتىن ءىس-شارالاردى موبيلدىك قوسىمشانىڭ كومەگىمەن بىلۋگە بولادى
جاس ونەرتاپقىش «Caspian startup -2019» ستارتاپتار بايقاۋىنىڭ جەڭىمپازى اتانىپ، موبيلدى قوسىمشا ازىرلەپ شىقتى. ولاي بولسا انەلي ويلاپ تاپقان «Chance « موبيلدىك قوسىمشانىڭ قولدانۋشىلار ءۇشىن قانداي پايداسى بار.
جاس ماماننىڭ الداعى جوسپارى تۋرالى قازاقپارات ءتىلشىسى سۇراپ بىلگەن بولاتىن.
«مەنىڭ جاسىم 19 دا. اقتاۋ قالاسىنداعى فيزيكا-ماتەماتيكا مەكتەبىن ءبىتىرىپ، قازىر الماتى قالاسىندا اۋدارماشى (كورەي ءتىلى) ماماندىعىن مەڭگەرىپ جاتىرمىن. مەن ءوزىم 12 جاسىمنان حاكەر بولۋدى ارماندادىم. سوعان جاقىن بولدىم. 10-سىنىپتا ينفورماتيكا ءپانىنىڭ مۇعالىمى جارىس بولاتىنىن ايتىپ، مەنىڭ قاتىسقانىمدى قالادى. مەن ويلانا كەلە جارىسقا قاتىسۋ كەرەك دەپ ۇيعارىپ، ماعان ءموبيلدى قوسىمشا ازىرلەۋ يدەياسى كەلدى. ناتيجەسىندە جارىستا جەڭىسكە جەتكەن جوقپىن، ءبىراق مەن ويلاپ تاپقان ەكى بىردەي موبيلدىك قوسىمشانى جۇزەگە اسۋىنا قولداۋ كورسەتەتىن دەمەۋشى تاپتىم. سولايشا دەمەۋشى مەنىڭ IT يدەياما قولداۋ كورسەتىپ «Chance « موبيلدىك قوسىمشاسى پايدا بولدى»، - دەدى انەلي رۋسلان قىزى.
سونداي-اق، جاس IT مامان اتالعان موبيلدىك قوسىمشانىڭ كوپشىلىك ءۇشىن قانداي پايداسى بارىن ايتتى.
«Chance « موبيلدىك قوسىمشاسىندا ەلىمىزدىڭ بۇكىل قالالارى بويىنشا قاي جەردە، قانداي ءىس-شارا وتەتىنى تۋرالى بىلۋگە بولادى.
اتاپ ايتقاندا، جارىس، كونفەرەنتسيا، ۆەبينار، مادەني جانە سپورتتىق ءىس-شارالار، اقىلى جانە تەگىن ءتۇرلى سالا كۋرستارى، سەمينار، شەبەرلىك ساباقتارى جانە تاعى باسقا. ياعني قاي جەردە، قانداي شارا وتەدى، وعان قالاي بارۋعا بولادى ءبارىن ءبىر جەردەن بىلۋگە بولادى.
جالپى ءوزىم وقۋشى كۇنىمنەن ءتۇرلى ءىس-شارالارعا قاتىسقاندى جاقسى كورەم جانە ءجيى قاتىسامىن. سول كەزدە ويلايتىنمىن ءار قالادا وتەتىن ءىس-شارالاردى ءبىر جەرگە جيناقتاسا عوي دەپ. موبيلدىك قوسىمشا جاساۋعا تۇرتكى بولعان وسى وي. 2019-جىلى يدەيا كەلىپ ىسكە كىرىستىم، ال قوسىمشا وتكەن جىلى جۇمىس ىستەي باستادى»، - دەيدى ول.
ونىڭ ايتۋىنشا، بۇگىندە موبيلدىك قوسىمشانى قولدانۋ اياسى كەڭەيىپ كەلەدى. جانە ونى ودان ءارى ىلگەرىلەتۋ ماقساتىندا 6 ادام ەڭبەكتەنىپ جاتىر. سونداي-اق، موبيلدى قوسىمشانى Android جانە iOS پلاتفورماسىنان جۇكتەۋگە بولادى.
«قالالاردا وتەتىن ءىس-شارالار تۋرالى ۇيىمداستىرۋشىلارمەن الدىن الا حابارلاسىپ، اقپاراتتى موبيلدىك قوسىمشاعا جۇكتەيمىز. كەيدە ءوزىم جاريالايمىن، كەيدە ارىپتەستەرىم جۇكتەيدى. بۇعان دەيىن جاساپ شىققان دۇنيەمىزدى جارنامالاعان جوقپىز. ەندىگى ۋاقىتتا جارنامالاپ، ونى قولدانۋشىلار سانىن كوبەيتكىمىز كەلەدى. الدا جوسپار كوپ، سونىڭ ءبىرى موبيلدىك قوسىمشانىڭ فۋنكتسياسىن كەڭەيتۋ. سونداي-اق، IT سالاسىنا جاقىن بولسامدا، اۋدارماشى ماماندىعىن يگەرىپ جاتىرمىن. IT - مەن قاتار ءتىلدى دە ۇيرەنىپ، جان-جاقتى بولعىم كەلەدى»، - دەيدى ستۋدەنت.
