الماتىداعى مەترو «التىن وردا» بازارىنا دەيىن سوزىلادى - ستانسيالار سانى قانشا

الماتى. قازاقپارات - الماتى تۇرعىندارى مەترو جەلىسىن «التىن وردا» بازارىنا دەيىن ۇزارتۋ تۋرالى مالىمەتتى ءتۇسىندىرىپ بەرۋدى سۇراپ، قازاقپارات اگەنتتىگىنە جۇگىندى.

«التىن وردا بازارىنىڭ ماڭىندا تۇراتىن تۇرعىنداردى مەترو قاي جەردەن شىعاتىنى قىزىقتىرادى. ءبىز وسى اۋداندا تۇراتىندىقتان، كەز كەلگەن وزگەرىستەرگە بەي- جاي قاراي المايمىز. قازىردىڭ وزىندە بازار اۋماعىندا بوس جەردىڭ از ەكەنىنە نازار اۋدارساق، مەترو جەلىسى قاي جەردەن وتەتىنىن بىلگىم كەلەدى. ويتكەنى، تومەنگى بولىكتىڭ اۋماعىندا جەكە ۇيلەر بار. بوس ۋچاسكەلەر تەك رايىمبەك تاسجولىنىڭ بويىندا عانا بار»، - دەپ سۇرادى الماتىلىق تيمۋر گيماديەۆ.

بىزگە الماتى قالاسىنىڭ موبيلدىلىك باسقارماسىنان حابارلاعانىنداي، باتىس باعىتتاعى جولدى اباي داڭعىلى بويىمەن ودان ءارى الاتاۋ داڭعىلىنىڭ بويىمەن رايىمبەك داڭعىلىنا دەيىن ۇزارتۋ الدىن الا قاراستىرىلعان.

«مەترونىڭ ءۇشىنشى كەشەن جەلىسىن ىسكە قوسۋ تۇزەتىلگەن باعىتقا سايكەس قالقامان ستانسياسىن اباي داڭعىلىنىڭ بويىمەن سولتۇستىك جاعىنان، ءاشىموۆ كوشەسىمەن قيىلىستا ورنالاستىرۋ قاراستىرىلعان. ءبىرىنشى بەكەت الاتاۋ كوشەسىنىڭ بويىندا ناۋرىزباي اكىمدىگىنەن سولتۇستىككە قاراي ورنالاسادى دەپ جوسپارلانۋدا. ەكىنشى ستانسيا الاتاۋ كوشەسىنىڭ بويىمەن تولە بي كوشەسىنىڭ قيىلىسىندا ورنالاسقان. ءۇشىنشى ستانسيا «بارلىق» بازارىنىڭ اۋماعىندا، رايىمبەك داڭعىلىنىڭ وڭتۇستىك جاعىندا، جول بويىندا ورنالاسقان»، - دەپ حابارلادى ۆەدومستۆودان.

بولاشاق ستانسيالاردىڭ ناقتى ورنالاسۋى، سونداي- اق ساتىپ الىناتىن جەر تەلىمدەرىنىڭ سانى بارلاۋ جۇمىستارى اياقتالىپ، تەحنيكالىق- ەكونوميكالىق نەگىزدەمەسى ازىرلەنگەننەن كەيىن انىقتالادى. سونداي- اق، قالالىق موبيلدىلىك باسقارماسى جولدىڭ باعىتىن وزگەرتۋگە بايلانىستى «زاپادنىي» اۆتوۆوكزالىنىڭ جوباسى ءوز ماقساتىن جوعالتقانىن اتاپ ءوتتى. بۇعان دەيىن الماتى اكىمىنىڭ ورىنباسارى سەرىك قۇسايىنوۆ قالادا سالىنىپ جاتقان مەترونىڭ باعىتىنا تۇزەتۋ ەنگىزىلگەنىن ايتقان بولاتىن.

اۆتور: الما مۇقانوۆا