ماڭعىستاۋ وبلىسىندا «بالىقشىلار» ساياباعى اشىلدى

باۋتين. قازاقپارات - ماڭعىستاۋ وبلىسى ءتۇپقاراعان اۋدانى، باۋتين اۋىلىنا قاراستى اتاش ەلدى مەكەنىندە «بالىقشىلار» دەمالىس ورنى پايدالانۋعا بەرىلدى، دەپ حابارلايدى قازاقپارات.

ءتۇپقاراعان اۋدانى اكىمدىگىنىڭ باسپا ءسوز قىزمەتىنەن ءمالىم ەتكەندەي، جوبا ەل تاۋەلسىزدىگىنىڭ 30 جىلدىعىنا وراي جۇزەگە اسىرىلعان. جالپى اۋماعى 2400 شارشى مەتر بولاتىن ساياباقتا كىرەبەرىس اركا، سپورت الاڭى، بالالار ويىن الاڭى، اۆتوتۇراق پەن شاتىرلى ورىندىقتار بار. دەمالىس ورنىنىڭ قاق ورتاسىندا بيىكتىگى 3,80 مەتر بولاتىن «بالىقشىلار» ەسكەرتكىشى ورناتىلعان.

ءمۇسىننىڭ اۆتورى ماڭعىستاۋلىق كولونەر شەبەرى بولاتبەك سالايەۆ. ەسكەرتكىش دەمەۋشىلەردىڭ قاراجاتى ەسەبىنەن تۇرعىزىلدى.

سالتاناتتى جيىندا اۋىل اقساقالى قويلىعۇل اتشىبايەۆ پەن ارداگەر بالىقشى، ءتۇپقاراعان اۋدانىنىڭ قۇرمەتتى ازاماتى ءتاۋىرحان قانجانوۆ ەسكەرتكىشتى اشىپ، اۋىل تۇرعىندارىن تاۋەلسىزدىكتىڭ 30 جىلدىعىمەن قۇتتىقتادى.

«قۋانىشىمىز ەسەلەنىپ تۇر. ويتكەنى بۇل ەسكەرتكىش ءبىزدىڭ وتكەن تاريحىمىزعا ەلەۋلى ەڭبەگى سىڭگەن ارداگەرلەرگە دەگەن قۇرمەتتىڭ بەلگىسى دەپ بىلەمىن. ەلىمىزدىڭ ۇلىق مەرەكەسى قارساڭىندا بوي كوتەرگەن ەسكەرتكىش پەن دەمالىس ورنى اۋىلىمىزدىڭ كوركىنە كورىك قوسىپ، اجارىن اشا تۇسكەندەي»، - دەدى ءتاۋىرحان قانجانوۆ.