د د ۇ: پاندەميا الەمدەگى كەدەيلىكتى ۋشىقتىرا تۇسەدى
بۇل تۋرالى دۇنيەجۇزىلىك دەنساۋلىق ساقتاۋ ۇيىمى (د د ۇ) مەن دۇنيەجۇزىلىك بانكتىڭ جاڭا ەسەبىندە جازىلعان، دەپ حابارلايدى قازاقپارات ب ۇ ۇ- نىڭ جاڭالىقتار سايتىنا سىلتەمە جاساپ.
ورتاق زەرتتەۋ حالىقارالىق دەنساۋلىق ساقتاۋ قىزمەتتەرىمەن قامتۋ كۇنىنە ارنالعان. ءوزىنىڭ جولداۋىندا وسى جاعداي بويىنشا ب ۇ ۇ- نىڭ باس حاتشىسى انتونيۋ گۋتەرريش پەندەميانىڭ ءۇشىنشى جىلى جاقىندار الدىندا حالىقارالىق قوعامداستىق تەز ارادا ۇلتتىق دەنساۋلىق ساقتاۋ جۇيەلەرىن نىعايتۋ كەرەك ەكەنىن مالىمدەدى. ولار ودان ءارى ءادىل، تۇراقتى بولىپ، حالىقتىڭ بارلىق بولىگىنە قولجەتىمدى بولۋى ءتيىس.
ب ۇ ۇ- نىڭ باسشىسى پاندەميانىڭ، اسىرەسە، بارلىعىنا ساپالى جانە قولجەتىمدى كومەك كورستۋگە قابىلەتتى دەنساۋلىق ساقتاۋ جۇيەلەرى جوق ەلدەرگە قاتتى اسەر ەتكەنىن اتاپ ءوتتى. ەگەر حالىقارالىق قوعامداستىق 2030 -جىلعا دەيىن دەنساۋلىق ساقتاۋ سالاسى قىزمەتتەرىمەن بارلىعىن قامتۋدى كوزدەپ وتىرسا، انتونيۋ گۋتتەريشتىڭ ايتۋىنشا، ۇلتتىق ۇكىمەتتەر ورتاق ىسكە بىرگە جۇمىلۋى كەرەك.
«العاشقى مەديتسينالىق- سانيتارلىق كومەك كورسەتۋ، سونىمەن قاتار مارگينالدانعان حالىق بولىگىن قولداۋ ءۇشىن دەنساۋلىق ساقتاۋ جۇيەلەرىنە قۇيىلاتىن ينۆەستيتسيالار كولەمىن ارتتىرۋ كەرەك. ۇلتتىق ەكونوميكانىڭ تۇراقتىلىعىن قامتاماسىز ەتۋ ءۇشىن دەنساۋلىق ساقتاۋ جۇيەلەرىن داعدارىسقا دەيىن نىعايتۋ قاجەت»، - دەدى ب ۇ ۇ- نىڭ باس حاتشىسى.
انتونيۋ گۋتەرريشتىڭ ايتۋىنشا، وتكەن جىلى COVID-19-عا قارسى ۆاكسينانىڭ ءتۇرلى توپتار اراسىندا تەڭ بولىنبەۋى ادامزاتتىڭ قالتالى بولىگىنىڭ ەگويزمىنىڭ كورىنىسى بولدى. «بىزگە بۇل قايعىلى جاعدايدان ساباق الۋ كەرەك. پاندەميا بارلىعىندا اياقتالمايىنشا، ەشكىمگە اياقتالمايدى» - دەدى ب ۇ ۇ باسشىسى.
«2020 -جىلى پاندەميا مەديتسينالىق قىزمەتتەردىڭ جۇمىسىن بۇزدى، سالدارىنان ۇلتتىق دەنساۋلىق ساقتاۋ جۇيەلەرىنە سالماق ءتۇستى. سوڭعى ون جىلدا ءبىرىنشى رەت حالىقتى يممۋنداۋ ازايىپ، تۋبەركۋلەز بەن بەزگەكتەن بولعان ءولىم سانى ارتتى»، دەلىنگەن اتالعان ۇيىمداردىڭ بايانداماسىندا.
پاندەميا سالدارىنان 1930 -جىلعى ەكونوميكالىق داعدارىس قايتا باستالدى، ادامدار ەڭ قاجەتتى مەديتسينالىق كومەكتى تولەۋگە قينالىپ وتىر.
«ءبىزدىڭ ارتىق ۋاقىتىمىز قالمادى. ەل ۇكىمەتتەرى تەز ارادا دەنساۋلىق ساقتاۋ قىزمەتتەرىن ءاربىر ادام الۋى ءۇشىن جاعداي جاساپ، ادام باسىنا شاققانداعى مەملەكەتتىك قارجىلاندىرۋ كولەمىن ارتتىرۋ كەرەك» - دەدى تەدروس گەبرەيەسۋس.
