وميكرون شتاممىنىڭ قازاقستانعا جەتۋى ۋاقىت ەنشىسىندە - ايجان ەسماعامبەتوۆا

نۇر-سۇلتان. قازاقپارات - وميكرون شتاممى قازاقستان اۋماعىنا ەرتەلى-كەش جەتەدى.

بۇل تۋرالى ق ر دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتىنىڭ ءتوراعاسى ايجان ەسماعامبەتوۆا ايتتى، دەپ حابارلايدى قازاقپارات ءتىلشىسى.

«بۇگىندە وميكرون الەمنىڭ 60 قا جۋىق ەلىندە تىركەلگەن. مۇنىڭ ءوزى 1 ايدىڭ ىشىندە ورىن الدى. بۇل دەگەنىڭىز، وميكروننىڭ وتە جىلدام تارايتىندىعىن بىلدىرەدى. وزگە شتاممداردى مىسالعا الا وتىرىپ، وميكروننىڭ قازاقستانعا تاسىمالدانۋى تەك ۋاقىت ەنشىسىندە ەكەندىگىن ايتۋعا بولادى. بۇل شتاممنىڭ ەلىمىزگە تاسىمالدانۋىنىڭ الدىن الۋ ءۇشىن قابىلدانىپ جاتقان ءىس-شارالار ارقىلى سول ۋاقىتتى ۇزاققا سوزۋعا تىرىسىپ جاتىرمىز»، - دەدى كوميتەت ءتوراعاسى «BaigeNews» Youtube ارناسىندا وتكەن سۇحبات بارىسىندا.

ونىڭ اتاپ وتۋىنشە، قازىرگى ۋاقىتتا كوروناۆيرۋستىڭ جاڭا شتاممى - وميكرونعا قاتىستى عىلىمي نەگىزدە دالەلدەنگەن سەنىمدى مالىمەتتەر جوق.

«وعان كلينيكالىق، ەپيدەميولوگيالىق مالىمەتتەر، ونى ەمدەۋدىڭ ءارى الدىن الۋدىڭ ءتۇرلى ادىستەرىنىڭ تيىمدىلىگى تۋرالى اقپاراتتار جاتادى. ال ءبىز ءۇشىن بۇل ۋاقىت شتاممنىڭ وزگەرىسكە ۇشىراعانىنا نە ۇشىراماعاندىعىنا قاتىستى مالىمەتتەردىڭ پايدا بولۋى ءۇشىن قاجەت. ول كەي ناۋقاستا اۋىر نەمەسە جەڭىل وتەدى. كەيدە وتە قاۋىپتى، ءتىپتى اۋىر جاعدايلارعا دۋشار قىلىپ، ءولىم-جىتىمگە دە الىپ كەلەدى»، - دەدى ايجان ەسماعامبەتوۆا.