قىرىمبەك كوشەربايەۆ جوعارى مەملەكەتتىك ناگرادالاردى تابىس ەتتى
بۇل تۋرالى اقوردانىڭ باسپا ءسوز قىزمەتى ءمالىم ەتتى.
قىرىمبەك كوشەربايەۆ تاۋەلسىزدىك ەلىمىزدى الەمگە ازاتتىق سۇيگىش، رۋحى بيىك، نامىسى بەرىك حالىق رەتىندە تانىتقانىن اتاپ ءوتتى.
- تۋعان حالقىنىڭ سەنىمىن ارقالاعان ەلباسى مەن قازاقستان ەگىز ۇعىمعا اينالدى. نۇرسۇلتان ءابىش ۇلىنىڭ بولاشاقتى بولجاپ، كەلەشەكتى كورە بىلگەن كورەگەن ساياساتىنىڭ ارقاسىندا تاۋەلسىزدىكپەن بىرگە قوعامنىڭ تۇتاستاي جاڭاشا ويلاۋ جۇيەسى قالىپتاستى. تاۋەلسىز قازاقستاننىڭ تۋىن تىكتەپ، شەكاراسىن شەگەندەپ، الەمدىك ارەنادا ءوز ورنىن ويىپ تۇرىپ الۋىنا تۇڭعىش پرەزيدەنت - ەلباسى نۇرسۇلتان ءابىش ۇلى نازاربايەۆ ەرەن ەڭبەك ءسىڭىردى. ال مەملەكەت باسشىسى قاسىم-جومارت كەمەل ۇلى توقايەۆ ەلباسى قالىپتاستىرعان داڭعىل جولدى «ساباقتاستىق، ادىلەت، ورلەۋ» پرينتسيپتەرىمەن لايىقتى جالعاستىرىپ كەلەدى.
«حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرىپ، ەلىمىزدىڭ ودان ءارى دامۋىن قامتاماسىز ەتىپ وتىر. وسىلايشا، ءبىز قىسقا مەرزىمدە عاسىرعا پارا-پار جاسامپازدىق جولىنا تۇسە بىلدىك، - دەدى مەملەكەتتىك حاتشى.
قىرىمبەك كوشەربايەۆ وسى وتىز جىلدا قازاقستاننىڭ جاڭا كەلبەتى قالىپتاسقانىن، مەملەكەتىمىز جاڭعىرىپ، حالقىمىزدىڭ قايتا تۇلەگەنىن ايتتى. تاعدىرى ورتاق، تۇتاستىعى مىقتى كوپ ۇلتتى حالقىمىزدىڭ تاتۋلىعىن ساقتاۋ بۇگىنگى كۇننىڭ باستى ماقساتى ەكەنىنە توقتالدى.
- ۇلىسىمىز ءۇشىن ۇلىق، مەملەكەتىمىز ءۇشىن مارتەبەلى مەرەكە - تاۋەلسىزدىكتىڭ 30 جىلدىعى قارساڭىندا قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقايەۆ ەلىمىزدىڭ قوعامدىق-ساياسي، الەۋمەتتىك-ەكونوميكالىق دامۋىنا ەرەكشە ۇلەس قوسىپ جۇرگەن سىزدەردەي ازاماتتاردى جوعارى مەملەكەتتىك ناگرادالارمەن ماراپاتتادى. بۇل - سىزدەردىڭ جىلدار بويى اتقارعان تىنىمسىز ەڭبەكتەرىڭىزگە بەرىلگەن زور باعا، - دەدى قىرىمبەك ەلەۋ ۇلى.
جيىن سوڭىندا مەملەكەتتىك حاتشى ماراپات يەلەرىنە جوعارى مەملەكەتتىك ناگرادالارى مەن سىيلىقتارىن تابىستاپ، الداعى جۇمىستارىنا تابىس تىلەدى.
