قىزىلوردادا شىنى زاۋىتى ونىمدەرىن شىعارۋدا روبوتتار قولدانىلادى

قىزىلوردا. قازاقپارات - قىزىلوردادا الداعى ۋاقىتتا جۇمىسىن باستايتىن شىنى زاۋىتى ونىمدەرىن شىعارۋدا روبوتتار قولدانىلادى، دەپ حابارلايدى قازاقپارات ءتىلشىسى.

زاۋىت تولىق قۋاتتىلىعىنا شىققاندا 226 جاڭا جۇمىس ورنى اشىلادى. ال قوسالقى وندىرىستە 300-گە جۋىق ادام قىزمەت ەتەتىن بولادى. جەرگىلىكتى ماماندارعا باسىمدىق بەرىلىپ، كاسىبي تۇردە شىڭدالماق.

«ەل تاۋەلسىزدىگىنىڭ 30 جىلدىعىنا وراي وبلىس تۇرعىندارى تاباقشا شىنى زاۋىتىنىڭ كۇيدىرۋ پەشىن ىسكە قوسۋ راسىمىنە كۋا بولدى. جوبا اياسىندا وڭىرگە 42 ميلليارد تەڭگەدەن اسا ينۆەستيتسيا تارتىلعان بولاتىن. جىلىنا 197 مىڭ توننادان اسا ءونىم شىعاراتىن كاسىپورىن - ەل نارىعىن قامتاماسىز ەتىپ، شەت مەملەكەتتەرگە ەكسپورتتالادى. شىنى زاۋىتىنىڭ ىسكە قوسىلۋىمەن شيكىزاتتىق ەمەس سەكتوردى دامىتىپ، ىلەسپە وندىرىستەردى قۇرۋدى كوزدەپ وتىرمىز. بۇگىندە ينۆەستورلارمەن بىرلەسىپ ەكى جوبانى باستادىق. بۇل - كومپوزيتتىك ماتەريالدار مەن اينا ءوندىرىسى. اتاپ ءوتۋ قاجەت، تەك 2020 -جىلدىڭ قورىتىندىسىمەن ەلگە قۇنى شامامەن 65 ميلليون ا ق ش دوللارىن قۇرايتىن تۇرمىسقا قاجەتتى شىنىلاردى قىتاي، گەرمانيا، وزبەكستان جانە تۇركيادان يمپورتتالعان. ءبىز زاۋىت ءوندىرىسىنىڭ ىسكە قوسىلۋىمەن كاپيتالدىڭ باسقا ەلدەرگە جىبەرىلۋىن توقتاتامىز جانە ەلدى ءوزىمىز اينەكپەن قامتاماسىز ەتەتىن بولامىز»، - دەدى وبلىستىق يندۋستريالىق- يننوۆاتسيالىق دامۋ باسقارماسىنىڭ باسشىسى رينات سۇلتانگەرەيەۆ.

«Orda Glass Ltd» سەرىكتەستىگى مەن قىتايلىق «China Triumph» كومپانيالارى بىرلەسىپ جۇزەگە اسىرىلعان شىنى زاۋىتى - يندۋستريالاندىرۋ باعدارلاماسىنىڭ نەگىزگى جوباسى. شىنى ءوندىرۋ بارىسىندا 90 پايىز جەرگىلىكتى شيكىزات ءونىمى قولدانىلماق.

«زاۋىتتا الەمنىڭ جەتەكشى ەلدەرى – ا ق ش، يتاليا، بەلگيا، فينليانديا، قىتايدا شىعارىلعان زاماۋي ۇلگىدەگى تەحنولوگيالار قولدانىلادى. نەگىزى زاۋىتتان شىعارىلعان ءونىمنىڭ 70 پايىزى ىشكى نارىقتا پايدالانادى. ال 30 پايىزى شەت ەلگە جونەلتىلەدى. قازىردىڭ وزىندە وزبەكستان، رەسەي، تۇرىكمەنستان، تاجىكستان، اۋعانستان، ءۇندىستاننان تاپسىرىستار تۇسۋدە.

تاعى ءبىر ەرەكشەلىگى، ۇلكەن كولەمدى جانە اۋىر سالماقتى شىنى تاباقشالارىن كەسۋگە جانە تاسىمالداۋعا روبوتتار قولدانىلماق. جالپى 3 اي ىشىندە بالقىتۋ پەشى 1600 گرادۋس تەمپەراتۋراعا دەيىن قىزىپ، تۇراقتى ءارى ۇزدىكسىز گازبەن جابدىقتاۋدى تالاپ ەتەدى. قازىرگى كەزدە يمپورتتالىپ كەلگەن 1 توننا شىنى 300-350 دوللاردى قۇراسا، ءبىزدىڭ زاۋىتتان شىعاتىن ءونىمنىڭ باعاسى 200-250 دوللاردىڭ كولەمىندە بولادى»، - دەدى «Orda Glass Ltd» ج ش س باسقارما ءتوراعاسى ەرجان ساعىنبايەۆ.