تاشكەنتتە «قازاق- قاراقالپاق ادەبي بايلانىستارى» اتتى وقۋلىق جارىق كوردى
جوعارۋ وقۋ ورىندارى ستۋدەنتتەرى ءۇشىن ارنالعان وقۋلىق قۇرالدا قازاق - قاراقالپاق ادەبي بايلانىستارىن بىرنەشە بولىمگە ءبولىپ قاراستىرعان. «قازاق- قاراقالپاق حالىق اۋىز ادەبيەتىندەگى بايلانىستار، ەپوستارداعى ورتاق سيۋجەتتەر» اتتى العاشقى بولىمدە «الپامىس» داستانىنداعى ورتاق سيۋجەتتەر مەن ەرەكشەلىكتەر، قازاق- قاراقالپاق ەپوستىق جانە ليرو- ەپوستىق ورىنداۋشىلار شىعارماشىلىعى، «قىرىق قىز» داستانى، «گۇلدىرسىن» اڭىزى، قوس حالىقتىڭ سالت- ءداستۇر جىرلارىنداعى ۇقساستىقتار مەن ەرەكشەلىكتەر، تويباستار، سىڭسۋ، جار- جار، بەتاشار، جوقتاۋ جايلى تەرەڭ زەرتتەۋ بار.
ەكىنشى ءبولىم نوعايلى داۋىرىندەگى ورتاق بايلانىستارعا ارنالعان. سوپپاسلى سىپىرا جىراۋ، اسان قايعى ءسابيت ۇلى، دوسپامبەت، شالكيىز، اقتامبەردى، مۇيتەن، بۇقار، جيەن جىراۋ شىعارماشىلىعى - تاقىرىپ ارقاۋى.
«XIX عاسىر ادەبيەتىندەگى ادەبي بايلانىستار سيپاتى» بولىمىندە كۇنحوجا مەن شەرنياز، شوقان ءۋاليحانوۆ جانە قاراقالپاق ادەبيەتى، ءاجنياز بەن قىز مەڭەشتىڭ ايتىسى، بەرداق پەن ابايدىڭ ورتاق تاقىرىپتارى، تۇرماعامبەت ىزتىلەۋوۆ ەڭبەكتەرىنىڭ قاراقالپاق ادەبيەتىمەن بايلانىسى تۋرالى ءسوز قوزعالعان.
«XX عاسىر كەڭەستىك داۋىردەگى قازاق جانە قاراقالپاق ادەبيەتىندەگى بايلانىستار» اتتى ءتورتىنشى بولىمدە بەيىمبەت مايلين مەن مىرزاعالي دارىبايەۆ، ءسابيت مۇقانوۆ پەن جولمىرزا ايمىرزايەۆ ەڭبەكتەرىندەگى ۇندەستىك جايلى قىزعىلىقتى دەرەكتەر بار.
بەسىنشى ءبولىم «XX عاسىردىڭ ەكىنشى جارتىسىنداعى قاراقالپاق جانە قازاق پوەزياسى، ونداعى ادەبي بايلانىستار كورىنىستەرى» دەپ اتالىپ، كوپتەگەن اقىندار پوەزياسى جانە ي. يۋسۋپوۆ پوەزياسىنداعى قازاقستان تاقىرىبى زەرتتەلگەن.
«قازاق- قاراقالپاق ادەبيەتىنىڭ ناسيحاتتالۋى» ءبولىمى بەلگىلى قازاق اقىنى، حالىارالىق الاش سىيلىعىنىڭ لاۋرەاتى بايبوتا سەرىكبايەۆ ەڭبەكتەرىنە ارنالعان. «بايلانىستار جايلى ادەبي- عىلىمي ماقالالار شوعىرى» بولىمىندە ق. ارالبايەۆ پەن ش. سمامۋتوۆانىڭ ءاجنياز، ءسابيت مۇقانوۆ، تولەگەن ايبەرگەنوۆ، احمەت ءومىرزاق، بەگابات ۇزاقوۆ سياقتى قالامگەرلەر جايلى ماقالالارى توپتاستىرىلعان.
سوڭعى ءبولىم - «قاراقالپاقستاندا تۋعان قازاق قالامگەرلەرى شىعارماشىلىعىنان» دەپ اتالىپ، تولەگەن ايبەرگەنوۆ، ەسەنعالي راۋشانوۆ، راحمەت اياپبەرگەنوۆ، سابىر اداي، احمەت ءومىرزاق، باۋىرجان باباجان ۇلى، مۇرات بەكەي، ءادىل بالتا، بەگابات ۇزاقوۆ شىعارمالارى ومىربايانىمەن قوسا بەرىلگەن.
قازاق- قاراقالپاق حالىقتارىنىڭ ادەبي بايلانىستارى جايلى 1977 -جىلدان بەرى مۇنداي ەڭبەك جارىق كورمەگەنىن ەسكەرسەك، وقۋلىقتىڭ قوس ادەبيەتتە دە وقيعا ەكەنى ايقىندالا تۇسپەك. اتالمىش وقۋلىق وزبەكستانداعى ج و و- لاردىڭ قازاق ءتىلى جانە ادەبيەتى فاكۋلتەتتەرىندە وقىتىلادى.
اۆتور: قانات مامەتقازى ۇلى
