كۇنسۇلۋ زاكارياعا ءال-فارابي اتىنداعى مەملەكەتتىك سىيلىق بەرىلدى
«I دارەجەلى «داڭق» وردەنى ءبىزدىڭ مەملەكەتىمىزدىڭ ارنايى قىزمەتتەرىن قالىپتاستىرۋعا ۇلەس قوسقان بولات باەكەنوۆكە تاپسىرىلادى. ءال-فارابي اتىنداعى عىلىم مەن تەحنيكا سالاسىنداعى مەملەكەتتىك سىيلىق كۇنسۇلۋ زاكاريا مەن امانگەلدى سادانوۆقا بەرىلەدى.
كۇنسۇلۋ زاكاريا QazVac كوروناۆيرۋسىنا قارسى وتاندىق ۆاكسينا جاساعان جانە قازىر بىرنەشە ۇقساس پرەپاراتتاردى جاساپ جاتقان عالىمدار توبىن باسقارادى. امانگەلدى سادانوۆ ءبىزدىڭ ەلىمىز ءۇشىن جاڭا جانە وزەكتى باعىت - بيوتەحنولوگيا مەن توپىراق ميكروبيولوگياسىن زەرتتەيتىن عىلىمي مەكتەپ قۇردى»، - دەدى مەملەكەت باسشىسى مەملەكەتتىك ناگرادالار يەگەرلەرىن ماراپاتتاۋ راسىمىندە. سونىمەن بىرگە، Ⅱدارەجەلى «داڭق» وردەنى ق ر باس پروكۋرورىنىڭ ورىنباسارى بولات دەمبايەۆقا، ۇلتتىق قاۋىپسىزدىك كوميتەتى ءتوراعاسىنىڭ ورىنباسارى داۋلەت ەرعوجينعا جانە ق ر توتەنشە جاعدايلار ءمينيسترى يۋري يلينگە بەرىلدى.
«تاۋەلسىزدىكتىڭ 30 جىلدىعى قارساڭىندا، وسىنداي سالتاناتتى جيىندا جوعارى دارەجەلى مەملەكەتتىك ماراپات العانىم - مەن ءۇشىن ۇلكەن مارتەبە. وسىنداي كۇردەلى كەزەڭنىڭ قيىنشىلىقتارىنان ءوتىپ، ەلىمىز جوعارى دەڭگەيگە كوتەرىلدى. ونىڭ ىشىندە وسى دەرتكە عانا توتەپ بەرمەي، ءوز ۆاكسينامىز QazVac-تى ازىرلەپ، ادامزاتتى قورعاۋ ءۇشىن بارلىعىن سالدىق. قۇرمەتتى قاسىم-جومارت كەمەل ۇلى، قازاقستان عىلىمىنىڭ الدىنا قويعان تاپسىرماڭىزدى ءبىزدىڭ عالىمدارىمىز بۇلجىتپاي ورىندادى. مۇنداي جوعارى دارەجەگە تەك قانا ءسىزدىڭ قولداۋىڭىزبەن، ۇكىمەتتىڭ قولداۋىمەن بارشا كوزى اشىق كوكىرەگى وياۋ عالىمداردىڭ قوسقان ۇلەسىمەن جەتتىك. قۇرمەتتى ارىپتەستەر، كەلە جاتقان تاۋەلسىزدىك كۇنى تۇعىرلى بولسىن!»، - دەدى كۇنسۇلۋ زاكاريا. بۇعان دەيىن پرەزيدەنت قاسىم-جومارت توقايەۆ تاۋەلسىزدىكتىڭ 30 جىلدىعى قارساڭىندا ەل ازاماتتارىنا العىس ايتقان ەدى. سونداي-اق، ەلىمىزدىڭ ەڭ جوعارى اتاعى - «قازاقستاننىڭ ەڭبەك ەرى» ماراپاتى ءۇش ادامعا تابىس ەتىلدى. «وتان» وردەنىمەن ەڭبەك ارداگەرى، كورنەكتى مەلمەكەت جانە قوعام قايراتكەرى، بەلگىلى عالىم مىرزاتاي جولداسبەك پەن تانىمال اقىن اقۇشتاپ باقتىگەرەيەۆا جانە كورنەكتى جازۋشى ءسابيت دوسانوۆ ماراپاتتالدى. ال I دارەجەلى بارىس وردەنىمەن مەملەكەت جانە قوعام قايراتكەرلەرى - نۇرتاي ابىقايەۆ، داريعا نازاربايەۆا، قۋانىش سۇلتانوۆ جانە بەلگىلى عالىم تىلەكتەس ەسبولوۆ، «زەنيت» ورال زاۋىتى» ا ق باس ديرەكتورى ۆياچەسلاۆ ۆاليەۆ ماراپاتتالدى.
اۆتور: ايجان سەرىكجان قىزى
