اكىم تارازي «قازاقستاننىڭ ەڭبەك ەرى» اتاعىن الدى

نۇر-سۇلتان. قازاقپارات - قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ ەلىمىزدىڭ ەڭ جوعارى اتاعى - «قازاقستاننىڭ ەڭبەك ەرى» ماراپاتىن تابىس ەتتى، دەپ حابارلايدى قازاقپارات.

«بۇگىن ءبىر توپ قايراتكەرىمىز مەنىڭ جارلىعىممەن مەملەكەتتىك ماراپاتتارعا يە بولدى. بيىل ەلىمىزدىڭ ەڭ جوعارى اتاعى كورنەكتى جازۋشى، دراماتۋرگ اكىم تارازيعا بەرىلدى. ول رۋحانياتىمىزدى دامىتۋعا جانە قوعامدى كەلىسىمدى نىعايتۋعا ولشەۋسىز قوسىپ، «قازاقستاننىڭ ەڭبەك ەرى» اتاندى. كورنەكتى قالامگەردىڭ شىعارماشىلىق جولى - جاس ۇرپاققا قاشاندا ۇلگى- ونەگە. نۇر-سۇلتان قالاسىنداعى كوپبەيىندى مەديتسينا ورتالىعىنىڭ ديرەكتورى مۇحتار تولەتايەۆ «قازاقستاننىڭ ەڭبەك ەرى» اتاعىنا يە بولدى. ول باسقاراتىن اۋرۋحانا ۇجىمى پاندەميا باستالعاننا بەرى كوروناۆيرۋس جۇقتىرعان 15 مىڭ ادامدى ەمدەپ شىعارعان. قاتەرلى ىسىككە شالدىققان جاندارعا وسى مەكەمەدە بىلتىر 3 مىڭ وتا جاسالدى، 8 مىڭ ادام اۋرۋىنان ايىقتى. وسى ورايدا دارىگەرلەرىمىزدىڭ ەڭبەگى قانداي قۇرمەتكە دە لايىق»، - دەدى مەملەكەت باسشىسى مەملەكەتتىك ناگرادالار يەگەرلەرىن ماراپاتتاۋ راسىمىندە.

سونداي-اق «قازاقستاننىڭ ەڭبەك ەرى» اتاعى شىعىس قازاقستان وبلىسىنىڭ «قازمىرىش» ج ش س باس ديرەكتورى ا. حمەليەۆكە بەرىلدى. ول شيرەك عاسىردان بەرى وندىرىستە جۇمىس ىستەپ، قاتارداعى ەلەكترومەحانيكتەن باسشى لاۋازىمىنا دەيىن كوتەرىلگەن جانە ءوندىرىستىڭ جاڭعىرۋى مەن ەلىمىزدىڭ ونەركاسىپتىك الەۋەتىن نىعايتۋعا ۇلكەن ۇلەس قوسقان.

ايتا كەتەيىك، اقوردادا مەملەكەت باسشىسىنىڭ جارلىعىمەن ەلىمىزدىڭ الەۋمەتتىك- ەكونوميكالىق جانە مادەني دامۋىنا، حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەسى، بەلسەندى قوعامدىق قىزمەتى ءۇشىن ءبىر توپ ازامات مەملەكەتتىك ناگرادالارمەن ماراپاتتالدى. بۇعان دەيىن پرەزيدەنت قاسىم-جومارت توقايەۆ تاۋەلسىزدىكتىڭ 30 جىلدىعى قارساڭىندا ەل ازاماتتارىنا العىس ايتقان ەدى.

اۆتور: ايجان سەرىكجان قىزى