اتىراۋلىق ساقشىلار كوپىردەن سەكىرگەن قىزدى قۇتقاردى

نۇر-سۇلتان. قازاقپارات - اتىراۋ پوليتسەيلەرى كوپىردەن سەكىرىپ كەتكەن قىزدى قۇتقاردى.

بۇل تۋرالى polisia.kz سايتى جازدى، دەپ حابارلايدى قازاقپارات ءتىلشىسى.

وقيعا 12-جەلتوقسان كۇنى تۇنگى ساعات 22.20 شاماسىندا بولعان. «102» ءنومىرىنىڭ پۋلتىنە اتىراۋ شاعىناۋدانىندا ورنالاسقان كوپىردەن بەلگىسىز ادام سەكىرىپ كەتكەنى تۋرالى حابارلاما كەلىپ ءتۇستى. وقيعا ورنىنا جەتكەن پوليتسيا قىزمەتكەرلەرى يساتاي تۇرسىنعاليەۆ پەن عالىم قالبايەۆ باتىپ بارا جاتقان قىزدى بايقاپ، دەرەۋ قۇتقارۋ ارەكەتتەرىنە كىرىستى.

عالىم قالبايەۆ بەلىنە ارقان بايلاپ، مۇزداي سۋدىڭ ورتاسىنداعى قىزعا بەتتەدى. بۇل كەزدە يساتاي تۇرسىنعاليەۆ ساقتىق ءۇشىن ارقاننىڭ ەكىنشى ۇشىن ۇستاپ تۇردى. ولارعا ماحامبەت قاباسوۆ پەن قۇرالبەك قالماعانبەتوۆ كومەككە كەلگەن سوڭ ول دا سۋعا كىردى. ساقشىلار قىزدى 20 مينۋت ىشىندە جاعاعا شىعاردى»، - دەپ جازادى polisia.kz.

پوليتسيانىڭ دەرەگى بويىنشا، قۇتقارىلعان قىز كامەلەتكە تولماعان. العاشقى مەديتسينالىق كومەك كورسەتكەننەن كەيىن ءتارتىپ ساقشىلارى ونى №5-ەمحاناعا جەتكىزدى.

«ويلانۋعا ۋاقىت بولمادى. مۇندايدا ءار ءسات ماڭىزدى بولعاندىقتان، بىردەن سۋعا كىردىك. ارىپتەسىمنىڭ ارتىمنان ءجۇزىپ كەلە جاتقانىن اڭعاردىم. ءبىراق ونىڭ ءبارىن تارازىلاپ جاتاتىن ۋاقىت جوق ەدى. سۋدان ۇشەۋمىز دە امان شىعۋىمىز ءۇشىن بارىنشا جىلدام قيمىلداي باستادىق. قىز مۇزداي سۋدا كوپ جاتىپ قالعاندىقتان، وكپەسىنە زاقىم كەلۋى مۇمكىن ەدى. سوندىقتان دەرەۋ اۋرۋحاناعا جەتكىزدىك»، - دەيدى عالىم قالبايەۆ.

اۆتور: ەسىمجان ناقتىباي