جىل جاڭالىعى: نۇر-سۇلتاندا ۇزدىك سپورتشىلار ماراپاتتالدى
«جىل جاڭالىعى» اتالىمىندا قازاقستاندىق كاراتەشى نۇرقانات ءاجىقانوۆ جەڭىسكە جەتتى دەپ حابارلايدى Olympic.kz.
نۇرقانات جاقىندا بىرىككەن اراب امىرلىكتەرىندە وتكەن الەم چەمپيوناتىندا ەكى قولا مەدال جەڭىپ الدى. ول الدىمەن جەكەلەي سىندا ۇزدىك ۇشتىككە ەنسە، كەيىن كوماندالىق سىنداعى تاريحي جۇلدەگە اتسالىستى. قازاقستان قۇراماسى ءۇشىنشى ورىن ءۇشىن وتكەن جەكپە- جەكتە تۇركيانى ۇتقان بولاتىن.
«مەن ەرەسەكتەر اراسىنداعى الەم بىرىنشىلىگىنە العاش رەت قاتىسىپ، جۇلدەمەن ورالدىم. بۇل سپورتتىق مانسابىمداعى ەڭ العاشقى ءارى ەڭ ءىرى جەڭىسىم بولاتىن. سوندىقتان، بۇگىنگى جەڭىس مەن ءۇشىن ەرەكشە ماڭىزدى. مەن ءۇشىن ەلىمىزدىڭ مىقتى سپورتشىلارىمەن ءبىر تىزىمدە تۇرۋ ۇلكەن ابىروي. ونىڭ ۇستىنە، مۇنداي بايقاۋ اتلەتتەردى ودان ءارى شابىتتاندىرادى. ءبىزدى ۇمىتپاي، ەڭبەگىمىزدى ەسكەرىپ جاتقان ۇلتتىق وليمپيادالىق كوميتەتكە كوپ راحمەت! داۋىس بەرگەن ءار جانكۇيەرگە دە العىسىم زور. ءبىز ءوز كەزەگىمىزدە حالىقتى جەڭىسپەن قۋانتۋعا تىرىسامىز. راحمەت!»، - دەدى سپورتشى.
