ەرالى توعجانوۆ زەينەتاقى جيناعىن پايدالانۋ بويىنشا حالىققا ۇندەۋ جاسادى

نۇر-سۇلتان. قازاقپارات - ق ر پرەمەر-ءمينيسترىنىڭ ورىنباسارى ەرالى توعجانوۆ مەملەكەت باسشىسى قاسىم-جومارت توقايەۆتىڭ پايدالانۋعا بولاتىن زەينەتاقى جيناقتارىنىڭ شەكتى مەجەسىن كوتەرۋ مەرزىمىن ۇزارتۋ تاپسىرماسىنا قاتىستى حالىققا ۇندەۋ جاسادى، دەپ حابارلايدى قازاقپارات.

ە. توعجانوۆتىڭ ايتۋىنشا، 2022-جىلعى 1- ساۋىرگە دەيىن شامامەن 500 مىڭ ازاماتقا وزدەرىنىڭ زەينەتاقى جيناقتارىنىڭ ءبىر بولىگىن: تۇرعىن ءۇي جاعدايلارىن جاقسارتۋعا، قۇنى جوعارى ەمدەلۋ اقىسىن تولەۋگە نەمەسە جەكە باسقارۋشى كومپانيالارعا بەرۋ ماقساتىندا پايدالانۋعا مۇمكىندىك بەرەدى. سونداي- اق جىل سوڭىنا دەيىن زەينەتاقى جيناقتارى ەسەبىنەن «وتباسى بانكتەگى» دەپوزيتتى تولىقتىرۋ فۋنكسياسى ىسكە قوسىلادى.

«بۇگىن پرەزيدەنتتىڭ تاپسىرماسىن جەدەل ورىنداۋ ماقساتىندا جيناقتاردىڭ شەكتى مەجەسىن كوتەرۋ مەرزىمىن ۇزارتۋ تۋرالى ۇكىمەت شەشىمىنىڭ جوباسى ازىرلەندى، ول جاقىن ارادا قابىداناتىن بولادى. وسى كۇنگە دەيىن زەينەتاقى جيناقتارىنىڭ ءبىر بولىگىن پايدالانۋ قۇقىعىن 606 مىڭنان استام ادام بارلىعى 2,2 تريلليون تەڭگە كولەمىندە قولداندى»، - دەدى ەرالى توعجانوۆ.

ونىڭ ىشىندە تۇرعىن ءۇي جاعدايلارىن جاقسارتۋعا - 527,2 مىڭ ادام (2 تريلليون استام تەڭگە)، ەمدەلۋ اقىسىن تولەۋگە - 75,7 مىڭ ادام (68 ميلليارد تەڭگە) بەرىلگەن. ال 3,2 مىڭ ادام 5 ملرد تەڭگە بولاتىن جيناقتارىن جەكە باسقارۋشى كومپانيالارعا بەرگەن.

«بۇل رەتتە زەينەتاقى جۇيەسىنىڭ نەگىزگى مىندەتى - ازاماتتاردىڭ زەينەتكەرلىككە شىققاننان كەيىنگى جەتكىلىكتى تابىسىن قامتاماسىز ەتۋ ەكەنىن اتاپ وتكىم كەلەدى. سوندىقتان، شەكتىلىك دەڭگەيى دە كوتەرىلگەن بولاتىن. ازاماتتارىمىز جيناقتىڭ شەكتى مەجەسىنەن جوعارى سومالاردى پايدالانۋ ولاردىڭ بولاشاق زەينەتاقىسىنىڭ مولشەرىن ەداۋىر قىسقارتاتىنىن ءتۇسىنۋى ءتيىس. سوندىقتان زەينەتاقى جيناقتارىنىڭ شەكتى مەجەسى بولاشاق زەينەتكەرلەردىڭ مۇددەلەرىن قورعاۋ ءۇشىن بەلگىلەنەدى. سوندىقتان، بۇل مۇمكىندىكتى اقىلمەن پايدالانۋ كەرەك دەپ ويلايمىن، اسا مۇقتاج بولعاندا، ەمدەلۋ نەمەسە پاتەر الۋ قاجەت بولعاندا وسى مۇمكىندىككە جۇگىنگەن ءجون»، - دەدى ە. توعجانوۆ.