تەننيس: جاس قازاقستاندىق ەۋروپا تۋرنيرىنىڭ جەڭىمپازى اتاندى
قازاقستان تەننيس فەدەراتسياسى ءمالىم ەتكەنىندەي، زاڭعار جۇپتىق سىندا دا تابىستى ونەر كورسەتىپ، فينالعا دەيىن جەتتى.
ز. نۇرلان ۇلى جەكەلەي سىندا 2 ساعات 40 مينۋتتا سوزىلعان سوڭعى باسەكەدە فرانسيالىق لەنە كۋتيۋرەنى 4:6، 6:0، 6:3 ەسەبىمەن تىزە بۇكتىردى.
زاڭعار ونى ءبىر اپتا بۇرىن وسى نورۆەگيا ەلىنىڭ بەرگەن قالاسىندا ۇتقان بولاتىن.
قازاقستاندىق تەننيسشى جارتىلاي فينالدا جارىستىڭ 1-راكەتكاسى، فرانسيانىڭ 14 جاسقا دەيىنگىلەر اراسىنداعى ۇزدىك ويىنشىسى لەنە پەتيتانى 7:5، 7:6 ەسەبىمەن جەڭدى.
بۇل ويىن دا تارتىستى ءوتىپ، 2 ساعات 18 مينۋتقا سوزىلدى. وسىلايشا زاڭعار نۇرلان ۇلى بيىل Tennis Europe سەرياسىنداعى ءۇش جارىستىڭ چەمپيونى اتانىپ، تاعى ەكەۋىندە فينالعا دەيىن جەتتى.
جىل سوڭىنا دەيىن قازاقستاندىق جاس سپورتشى ىستانبۇلدا وتەتىن دوداعا قاتىسىپ، ءبىر اپتا دەمالىستان كەيىن جاڭا ماۋسىمعا دايىندىعىن باستايدى.
ەسكە سالا كەتەيىك، بۇدان بۇرىن الداعى جىلى الماتى مەن تۇركىستاندا جاڭا تەننيس ورتالىقتارى اشىلاتىنىن جازعان بولاتىنبىز.
