ناتاليا گودۋنوۆا پرەزيدەنتكە توكيو وليمپياداسىنا بولىنگەن قاراجاتتى پايدالانۋ تۋرالى باياندادى

نۇر-سۇلتان. قازاقپارات - مەملەكەت باسشىسى قاسىم-جومارت توقايەۆ ەسەپ كوميتەتىنىڭ ءتوراعاسى ناتاليا گودۋنوۆانى قابىلدادى، دەپ حابارلايدى اقوردا.

پرەزيدەنت قاسىم-جومارت توقايەۆقا پاندەميامەن كۇرەسكە بولىنگەن 521 ميلليارد تەڭگە كولەمىندەگى قاراجاتتىڭ جۇمسالۋىنا جۇرگىزىلگەن تەكسەرۋدىڭ الدىن الا ناتيجەلەرى ۇسىنىلدى.

اتاپ ايتقاندا، اتالعان اۋديت اياسىندا مودۋلدى اۋرۋحانالاردىڭ قۇرىلىسىنا، جۇقپالى اۋرۋلار ستاتسيونارلارىن ماتەريالدىق-تەحنيكالىق تۇرعىدان جابدىقتاۋعا بولىنگەن قارجى، سونداي-اق جەكە قورعانىس قۇرالدارىن ساتىپ الۋ شىعىندارى تەكسەرىلدى.

سونىمەن قاتار ناتاليا گودۋنوۆا پرەزيدەنتكە توكيودا وتكەن 2020-جىلعى وليمپيادا ويىندارىنىڭ دايىندىعىنا بولىنگەن قاراجاتتى پايدالانۋ تيىمدىلىگىنە جۇرگىزىلگەن مەملەكەتتىك اۋديتتىڭ ناتيجەلەرى تۋرالى باياندادى.

سپورت كوميتەتىندە جۇرگىزىلگەن تەكسەرىس بارىسىندا دەنە شىنىقتىرۋ جانە سپورتتى دامىتۋ سالاسىنداعى ءىس-شارالارعا، ونىڭ ىشىندە 2020-جىلعى وليمپياداعا دايىندىققا جانە وعان قاتىسۋ ءۇشىن جۇمسالعان 125 ميلليارد تەڭگە كولەمىندەگى قارجىعا اۋديت جۇرگىزىلگەن.

كەزدەسۋ قورىتىندىسى بويىنشا مەملەكەت باسشىسى ءتيىستى تاپسىرما بەردى.