قازاقستان مەملەكەتتىلىگىن ورناتا الدى - ر ف دۋما ءتوراعاسىنىڭ ورىنباسارى
رەسەي فەدەراتسياسى مەملەكەتتىك دۋما ءتوراعاسىنىڭ ءبىرىنشى ورىنباسارى الەكساندر جۋكوۆ ق ر تاۋەلسىزدىگىنىڭ 30 جىلدىعىنا ارنالعان عىلىمي- پراكتيكالىق كونفەرەنسيادا وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
«30 جىل دەگەن - سالماقتى بەلەس. ءجۇرىپ وتكەن جولدى قايتا ءبىر سالماقتاپ، قورىتىندى شىعاراتىن كەزەڭ دەسە دە بولادى. رەسەي فەدەراتسياسى قازاقستان اۋماعىندا جاڭا مەملەكەتتىڭ قالاي قۇرىلىپ جاتقانىن باقىلاپ وتىردى. حالىقتىڭ بىرلىگى مەن ۇيىمشىلدىعىنىڭ ارقاسىندا، ەل باسشىلىعىنىڭ دانالىعى مەن كورەگەندەگىنىڭ ارقاسىندا تاريحي ولشەمدەگى قىسقا مەرزىم ىشىندە قازاقستان ەگەمەندىگى مەن تاۋەلسىزدىگىن الىپ، الەۋمەتتىك- ساياسي تۇراقتىلىققا قول جەتكىزە الدى. ەكونوميكاسىن تۇراقتاندىرىپ قانا قويماي، حالىقارالىق قاۋىمداستىقتىڭ بەدەلدى، قۇرمەتتى مۇشەسىنە اينالدى. ءبىز قازاقستاندىق دوستارىمىزدىڭ جەتىستىكتەرىن قۋانىشپەن قابىلدايمىز. قازاقستانمەن وداقتاس قاتىناسىمىزدى نىعايتۋ جانە دامىتۋ، ستراتەگيالىق ارىپتەستىك پەن ينتەگراتسيالىق بايلانىستى تەرەڭدەتۋ باعىتىن بەرىك ۇستانامىز. نۇر- سۇلتاننىڭ دا وسى باعىتپەن جىلجىپ كەلە جاتقانىن كورىپ وتىرمىز»، - دەگەن رەسەيلىك شەنەۋنىك ەكى ەلدىڭ اراسىنداعى ىنتىماق كوروناۆيرۋس پاندەمياسىن ەڭسەرۋدە ماڭىزدى رولگە يە بولعانىن اتادى.
«سەكسەنىنشى جىلداردىڭ سوڭىندا، توقسانىنشى جىلداردىڭ باسىندا بۇرىنعى ك س ر و قۇرامىنداعى ەلدەردىڭ ءبارىنىڭ ەكونوميكاسى تىرىعىققا تىرەلىپ، بايلانىستار تۇگەل كۇيرەگەن ەدى. نازاربايەۆتىڭ بەيبىتشىلىكتى تۋ ەتكەن جانە قورشاعان ورتانى قورعاۋعا باعىتتالعان ءبىرقاتار باستاماسى قازاقستانعا حالىقارالىق ارەنادا جوعارى بەدەل اكەلدى. بۇگىندە تولىق سەنىممەن ايتۋعا بولادى، قازاقستاننىڭ مەملەكەتتىلىگى ورنىقتى. ءبىز قازاقستان باسشىلىعى كوپۆەكتورلى سىرتقى ساياسات ۇستاناتىنىن كورىپ وتىرمىز. بەيبىتشىلىك پەن كەلىسىمدى ساقتاۋعا باعىتتالعان ساياساتىنىڭ ارقاسىندا الەم قاۋىمداستىعىنىڭ تولىققاندى، باستاماشىل مۇشەسىنە اينالدى»، - دەدى الەكساندر جۋكوۆ.
اۆتور: ەسىمجان ناقتىباي
