اقتوبەدە جولدىڭ قارسى باعىتىنا شىعىپ كەتكەن جۇرگىزۋشى كوپشىلىكتەن كەشىرىم سۇرادى

اقتوبە. قازاقپارات - اقتوبەدە مەملەكەتتىك ءنومىرى جوق كولىك جۇرگىزىپ، جولدىڭ قارسى باعىتىنا شىققان جۇرگىزۋشى ۇستالدى.

ول كوپشىلىكتەن كەشىرىم سۇرادى، دەپ حابارلايدى قازاقپارات ءتىلشىسى.

اقتوبە وبلىستىق پوليتسيا دەپارتامەنتى جولدىڭ قارسى باعىتىنا شىعىپ، ەرەجە بۇزعان كولىك جۇرگىزۋشىسىن تاپتى. الەۋمەتتىك جەلىگە جاريالانعان ماتەريالعا سۇيەنسەك، كولىكتىڭ مەملەكەتتىك ءنومىرى دە بولماعان. «الەۋمەتتىك جەلىگە مونيتورينگ جاساعان پوليتسيا قىزمەتكەرلەرى 9-جەلتوقسان كۇنى بەلگىسىز ادامنىڭ «لادا 2170» ماركالى كولىگىمەن جول ەرەجەسىن بۇزعانىن انىقتادى. جۇرگىزۋشى ءابىلقايىر حان داڭعىلىندا قارسى باعىتقا شىعىپ كەتكەن. سونىمەن بىرگە ونىڭ مەملەكەتتىك ءنومىرى دە بولمادى. پوليتسيا قىزمەتكەرلەرى ونى ىزدەپ تاۋىپ، اكىمشىلىك جاۋاپقا تارتتى»، - دەدى وبلىستىق پ د باسپا ءسوز قىزمەتىنىڭ جەتەكشىسى ەربولات سارقۇلوۆ.

ايتا كەتەيىك، اكىمشىلىك قۇقىق بۇزۋ كودەكسىنىڭ «كولىك قۇرالىن جولدىڭ ءجۇرۋ بولىگىندە ورنالاستىرۋ، قارسى ءجۇرىپ ءوتۋ نەمەسە باسىپ وزۋ قاعيدالارىن بۇزۋ» بابىنىڭ بەسىنشى بولىمىنە سايكەس 50 اەك كولەمىندە ايىپپۇل سالۋ كوزدەلگەن.

ال «كولىك قۇرالدارىن پايدالانۋ قاعيدالارىن بۇزۋ» بابىنىڭ ەكىنشى ءبولىمى بويىنشا 10 ا ە ك ايىپپۇل كوزدەلگەن.

اۆتور: التىناي ساعىندىقوۆا