تاۋەلسىزدىك جىلدارىندا قازاق ەلى قانشا ميلليون ادامعا كوبەيگەنى ايتىلدى
تاۋەلسىزدىكتىڭ 30 جىلدىعىنا ارنالعان عىلىمي- پراكتيكالىق كونفەرەنسيادا ق ر پرەمەر- ءمينيسترىنىڭ ورىنباسارى ەرالى توعجانوۆ وسىنداي مالىمەت كەلتىردى، دەپ حابارلايدى قازاقپارات ءتىلشىسى.
«بۇگىنگى 10-جەلتوقسان قازاقستاننىڭ تۇڭعىش پرەزيدەنتى نۇرسۇلتان ءابىش ۇلىنىڭ تىكەلەي حالىق سايلاۋى ارقىلى بيلىككە كەلىپ، انت بەرگەن كۇنىمەن سايكەس كەلىپ وتىر. سونىمەن قاتار 10-جەلتوقسان بۇگىنگى قازاق ك س ر-نىڭ قازاقستان رەسپۋبليكاسى بولىپ وزگەرگەن كۇنىمەن سايكەس كەلىپ تۇر»، - دەپ باستاعان ۆيتسە-پرەمەر 30 جىل بۇرىنعى قيىندىقتاردى ەسكە الدى.
«30 جىل بۇرىن قازاقستان الەۋمەتتىك- ەكونوميكالىق تۇرعىدا السىرەگەن مەملەكەت ەدى. ءومىر ساپاسى بويىنشا ءبىز بۇرىنعى وداقتاس ەلدەردىڭ اراسىندا 13 ورىندا تۇردىق. ك س ر و قۇلاعاننان كەيىن بۇرىنعى وداقتاستار اراسىنداعى ەكونوميكالىق بايلانىستىڭ ءۇزىلۋى شۇعىل گيپەرينفلياتسياعا، تۇراقتى بيۋدجەت تاپشىلىعىنا، حالىق تابىسىنىڭ شاپشاڭ تومەندەۋىنە، جاپپاي جۇمىسسىزدىقتىڭ وسۋىنە اكەپ سوقتىردى. ينفلياتسيا 3000 پروتسەتكە جەتكەن كەزدەرى بولدى. وسىنداي كۇردەلى كەزەڭدە ۇلت كوشباسشىسى ەلدىڭ دامۋىنا نەگىز بولعان «اۋەلى ەكونوميكا، ساياسات سودان كەيىن» دەيتىن ستراتەگيانى قابىلدادى. تۇڭعىش پرەزيدەنتتىڭ جەكە باسشىلىعىمەن قىسقا مەرزىمدە نارىقتىق ەكونوميكاعا جول اشقان ىرگەلى زاڭنامالىق بازا قۇرىلىپ، جاڭا فيسكالدىق جانە بانك جۇيەسى ەنگىزىلدى»، - دەدى ەرالى توعجانوۆ.
ۇكىمەت باسشىسىنىڭ ورىنباسارى تاۋەلسىزدىك جىلدارىندا قول جەتكىزگەن تابىستاردى سانمەن سويلەتتى.
«تاۋەلسىزدىك سيمۆولىنىڭ ءبىرى رەتىندە ۇلتتىق ۆاليۋتا - تەڭگە اينالىمعا شىعارىلدى. جاڭا ساۋدا- ەكونوميكالىق بايلانىس ورناتۋ بويىنشا شارالار قابىلداندى. نارىق شارتتارىنا كاسىپورىنداردى عانا ەمەس، حالىقتى دا يكەمدەۋ كەرەك ەدى. بۇل مۇمكىن بولدى. وتاندىق بيزنەستىڭ دامۋ جاعدايى تۇبەگەيلى وزگەردى. جۇمىس ىستەپ تۇرعان شاعىن جانە ورتا بيزنەستىڭ سانى 2005 -جىلعى 500 مىڭنان 2021 -جىلى 1,4 ميلليونعا دەيىن ارتتى. ناتيجەسىندە 30 جىل ىشىندە جالپى ىشكى ءونىم كولەمى دوللار ەكۆيۆالەنتىندە 17 ەسە ءوستى. وسى شارالاردىڭ ءبارى ەلدىڭ ۇزاق مەرزىمدى الەۋمەتتىك- ەكونوميكالىق دامۋى مەن ساياسي تۇراقتىلىعىنا نەگىز بولدى. حالىقتىڭ تابىسى 10 ەسە ارتىپ، جۇمىسسىزدىق دەڭگەيى 12,8 پايىزدان 4,9 پايىزعا دەيىن ازايدى. 20 جىلدىڭ ىشىندە حالىقتىڭ سانى 4 ميلليون ادامعا كوبەيدى. بۇگىن ەلدەگى ءومىر ءسۇرۋ ۇزاقتىعى 71 كە دەيىن ۇلعايدى. ەل تاۋەلسىزدىگىنىڭ باسىنان بەرى 1,5 ميلليون ازامات تۇرعىن ءۇي جاعدايىن جاقسارتتى. 5 مىڭنان استام جاڭا الەۋمەتتىك نىسان سالىندى. سونىڭ ارقاسىندا بالالاردى مەكتەپكە دەيىنگى ءبىلىم بەرۋمەن قامتۋ ۇلەسى 99 پايىزعا دەيىن جەتتى»، - دەدى ۆيتسە-پرەمەر.
اۆتور: ەسىمجان ناقتىباي
