داۋرەن ابايەۆ: تاتۋلىقتىڭ تۋى قيسايعاندا ازاتتىق ۋىستان شىقتى
«بابالارىمىز ءبورىلى بايراق استىندا بىرىككەن تۇستا بايكالدان بالقانعا دەيىنگى الىپ اۋماقتى ەركىن جايلادى. ارعى تەگىمىز ساق، عۇن تايپالارى ەۋرازيا توسىندە قۋاتتى مەملەكەت قۇرىپ، تۇتاس ادامزات دامۋىنا ەلەۋلى اسەر ەتتى. حالقىمىز ورتا عاسىرلىق اسا قۋاتتى يمپەريا - ۇلىق ۇلىستىڭ وزەگىن قۇرادى. كەيىننەن وسى جاسامپازدىق ءداستۇرىن جالعاستىرىپ، قازاق حاندىعىنىڭ شاڭىراعىن كوتەردى. ات تۇياعىن توزدىرىپ، اتان بەلىن ءۇزدىرىپ ءجۇرىپ، ۇرپاعىنا بۇگىنگى ۇلان بايتاق جەرىمىزدى مۇرا ەتتى. ال تاتۋلىقتىڭ تۋى قيسايعاندا ازاتتىق ۋىستان شىعىپ كەتتى. اسىرەسە، جيىرماسىنشى عاسىردىڭ سىناعى قازاق ءۇشىن وتە اۋىر بولدى»، - دەدى داۋرەن ابايەۆ «كوشباسشىلىق. تۇراقتىلىق پروگرەسس» اتتى كونفەرەنسيادا.
ونىڭ ايتۋىنشا، قازاق حالقى ⅩⅩ عاسىردىڭ العاشقى جارتىسىندا اسا زارداپتى سىناقتان امان وتكەن.
«بار-جوعى جارتى عاسىردىڭ ىشىندە بىرنەشە الاپات قاسىرەتتى، ساياسي قۋعىن- سۇرگىندى، دۇنيەجۇزىلىك سوعىستاردى باستان كەشىرۋ، جۇرتىمىزدى ەسەڭگىرەتىپ تاستاعانى جاسىرىن ەمەس. وسىنداي زوبالاڭدار كەزىندە ءتىلىمىز بەن سالت- داستۇرىمىزگە سۇيەنىپ، ۇلت رەتىندە ساقتالدىق. ءتول قۇندىلىقتارىمىزعا تابان تىرەپ، قايتا ەڭسە تىكتەدىك، ەگەمەندىككە قول جەتكىزدىك. دەگەنمەن، بوستاندىقتىڭ سىناعى بوداندىقتان كوپ بولماسا، از ەمەس. تاۋەلسىزدىكتى ەندى العان تۇستا التايدان كاسپييگە دەيىنگى الىپ اۋماعىمىز بولعانىمەن، شەكارامىز شەگەندەلمەگەن ەدى. جەرىمىزدىڭ استى- ءۇستى بايلىققا تولى بولعانىمەن، ونى ءوزىمىز يگەرىپ جاتقان جوق ەدىك. مۇمكىندىكتەرىمىز مول بولعانىمەن، قوعامداعى شەشىلمەگەن ءتۇيىندى تۇيتكىلدەر ودان دا كوپ بولعان. سوندىقتان ازاتتىقتىڭ تاڭى اتقاندا ەل تىزگىنىن نۇرسۇلتان نازاربايەۆ سياقتى كورەگەن ساياساتكەردىك ۇستاۋى قازاقتىڭ باعى دەۋگە بولادى»، - دەدى پرەزيدەن اكىمشىلىگى باسشىسىنىڭ ءبىرىنشى ورىنباسارى.
اۆتور: ەسىمجان ناقتىباي
