وسكەمەن تۇرعىندارى جاڭا ءۇيدىڭ ساپاسىزدىعىنا شاعىمداندى

وسكەمەن. قازاقپارات - وسكەمەن قالاسىنىڭ تۇرعىندارى ش ق و اكىمى دانيال احمەتوۆكە جاڭا سالىنعان كوپ قاباتتى ءۇيدىڭ ساپاسىزدىعىنا شاعىمداندى، دەپ حابارلايدى قازاقپارات ءتىلشىسى.

ايماق باسشىسى دانيال احمەتوۆتىڭ ايتۋىنشا، باۋىرجان مومىش ۇلى كوشەسىندەگى 14-ءۇيدى «بايتەرەك Development» يپوتەكالىق كومپانياسىنىڭ تاپسىرىسىمەن «گارانت قۇرىلىس» ۇيىمى سالعان. ال قازىرگى ۋاقىتتا بۇل كومپانيا بانكروت بولدى.

«قۇرىلىس جۇمىستارىنىڭ ساپاسىزدىعى سالدارىنان تۇرعىندار زارداپ شەگۋدە. ارنايى كوميسسيا قازىردىڭ وزىندە سمەتانى قايتا ەسەپتەپ، شەشىم شىعاردى. بارلىق كەمشىلىكتەردى جويۋ ءۇشىن 280 ميلليون تەڭگە قاجەت. ەگەر جىل سوڭىنا دەيىن كومپانيا وكىلدەرى ماسەلەنى شەشپەسە، وندا مەن كومپانيانى سوتقا بەرۋدى تاپسىردىم. ويتكەنى ماسەلە زاڭ اياسىندا شەشىلۋى كەرەك. ءوز تاراپىمىزدان كوپ قاباتتى ءۇي تۇرعىندارىنا كەمشىلىكتەردى جويۋعا بيۋدجەتتەن قاجەتتى سومانى ءبولىپ، قولداۋ كورسەتەمىز»، - دەدى ول.

تۇرعىنداردىڭ باسىم بولىگى پاتەردى نەسيەگە العان. ش ق و اكىمى ەكى- ءۇش كۇن ىشىندە يپوتەكالىق كومپانيانىڭ شەشىمىن كۇتەتىندىگىن جەتكىزدى.

«سودان سوڭ ارى قاراي قاي باعىتتا جۇمىس ىستەۋ كەرەكتىگىن شەشەمىز. ولار شارتقا قول قويىپ، جوندەۋ جانە قالپىنا كەلتىرۋ جۇمىستارىنا كەپىلدىك بەرۋى ءتيىس»، - دەدى دانيال احمەتوۆ.

اۆتور: تالعاتجان مۇحامەتبەك ۇلى