وڭتۇستىك كورەيا حالقىنىڭ سانى العاش رەت ازايدى
كورەيا ستاتيستيكاسىنىڭ سوڭعى بولجامىنا سايكەس، ەلدىڭ جالپى حالقىنىڭ سانى وتكەن جىلى 51,84 ميلليونعا جەتكەن، ال بيىل 51,75 ميلليونعا دەيىن تومەندەدى. اگەنتتىكتىڭ سوڭعى دەرەگى 2018 -جىلى وڭتۇستىك كورەيا حالقىنىڭ سانى 2029 -جىلى ازايا باستايدى دەپ بولجانعان بۇرىنعى باعالاۋىنان الدەقايدا ناشار.
ادەتتە، حالىقتىڭ جالپى سانى تۋۋ جانە ءولىم دەرەكتەرى نەگىزىندە ەسەپتەلەدى. قازىرگى جاعداي ەل حالقىنىڭ جالپى سانى 2030 -جىلى شامامەن 51,2 ميلليونعا دەيىن، ال 2070 -جىلى 37,7 ميلليونعا دەيىن ازايۋى مۇمكىن ەكەنىن كورسەتتى. سوڭعى بولجام وڭتۇستىك كورەيادا تۋ كورسەتكىشىنىڭ تومەندەۋى جانە تەز قارتايۋىمەن بايلانىستى دەموگرافيالىق ماسەلەلەردىڭ قوردالانا باستاعاندىعىن كورسەتەدى. وتكەن جىلى ەل حالقى العاش رەت تابيعي ازايۋدان زارداپ شەكتى، ويتكەنى ءولىم- ءجىتىم جاڭا تۋعان نارەستەلەردەن اسىپ ءتۇستى.
2020 -جىلى ەڭبەككە جارامدى حالىق نەمەسە 15 پەن 64 جاس ارالىعىنداعى ادامدار جالپى حالىقتىڭ 72,1 پايىزىنا جەتىپ، 37,4 ميلليون ادامدى قۇرادى. ەڭبەككە جارامدى حالىق سانىنىڭ ازايۋىنىڭ جالعاسۋى ەلدىڭ ءوسۋ الەۋەتىنە نۇقسان كەلۋى مۇمكىن دەگەن ءقاۋىپتى تۋىنداتىپ وتىر. وتكەن جىلى قارتتار 8,15 ميلليون ادامدى نەمەسە جالپى ساننىڭ 15,7 پايىزىن قۇراسا، 2024 -جىلى 10 ميلليوننان، 2070 -جىلى 17,5 ميلليوننان اسادى نەمەسە جالپى حالىقتىڭ 46,4 پايىزىن قۇرايدى دەپ بولجانۋدا.
