شەنەۋنىكتىڭ ايلىعى قانشا ەكەنىن سۇراۋ دا حايپتىڭ ءبىر ءتۇرى - داۋرەن ابايەۆ

نۇر-سۇلتان. قازاقپارات - ق ر پرەزيدەنت اكىمشىلىگى باسشىسىنىڭ ءبىرىنشى ورىنباسارى داۋرەن ابايەۆ مەملەكەتتىك قىزمەتشىلەردىڭ ايلىعىن سۇرايتىن جۋرناليستەرگە قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«مەن مۇنى «حايپ» دەيمىن. جەمقورلىق زاڭ بۇزۋ بولعاندا، لاۋازىمدىق وكىلەتىن اسىرا پايدالانۋ بولعاندا، مەملەكەتتىك قىزمەتشىنىڭ ارەكەتى ادەپكە جات بولعاندا سىناسا تۇسىنەم. ونداي سىندى قولداۋعا بولادى. شىنىن ايتقاندا، جۋرناليستەردىڭ مينيسترلەر مەن اكىمدەردىڭ ايلىعى قانشا ەكەنىن تەڭدەسسىز جۋرناليستىك زەرتتەۋ جۇرگىزىپ جاتقانداي كەيىپپەن سۇرايتىندارى ماعان كۇلكىلى سياقتى كورىنەدى»، - دەدى ول «اشىق ديالوگ» سۇحباتىندا.

ءبىرىنشى ورىنباسارى مۇنداي سۇراققا تاپ بولاتىن شەنەۋنىكتەرگە كەڭەس تە بەردى.

«ال اكىمدىكتەر مەن ۇكىمەتتەگى ارىپتەستەرىمە قىزارماي، تۇتىقپاي، ءوز ايلىعى تۋرالى شىندىقتى ايتۋعا كەڭەس بەرەتىن ەدىم. مەملەكەتتىك قىزمەتشىنىڭ ەڭبەكاقىسى پرەزيدەنت تاپسىرماسى بويىنشا كوتەرىلگەن بولاتىن. نە ءۇشىن؟ بۇل - قۇزىرەتى جوعارى ماماندار ءۇشىن كۇرەس. ءبىلىم-بىلىگى تومەن مەملەكەتتىك قىزمەتشىگە تاپ بولعان كەزدە ونىڭ ورنىندا بولۋى ءتيىس بىلىكتى ماماننىڭ بانكتە نەمەسە كەز كەلگەن كوممەرتسيالىق كومپانيادا جۇرگەنىن تۇسىنەسىز»، - دەدى داۋرەن ابايەۆ.