«قازاق فيلم» «ءولى ارا» تاريحي فيلمىنىڭ ءتۇسىرىلىمىن اياقتادى

نۇر-سۇلتان. قازاقپارات - الماتى وبلىسى كەربۇلاق اۋدانى بالعالى ستانتسياسىنىڭ ماڭىندا ۆەنگريالىق رەجيسسەر تاماش توتتىڭ «ءولى ارا» فيلمىنىڭ سوڭعى تۇسىرىلىمدەرى ءوتتى.

بۇل تۋرالى «قازاق فيلم» ا ق- نىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات.

تاريحي كينوتۋىندىنى ق ر مادەنيەت جانە سپورت مينيسترلىگىنىڭ تاپسىرىسى بويىنشا ۇلتتىق كينونى قولداۋ مەملەكەتتىك ورتالىعىنىڭ قولداۋىمەن ش. ايمانوۆ اتىنداعى «قازاق فيلم» كينوستۋدياسى ءتۇسىردى.

«بۇگىن ءبىز باستى كەيىپكەردىڭ قازاقستانعا كەلگەن ءساتىن تۇسىردىك. بۇل ساحنا فيلمنىڭ باسىندا كورسەتىلەدى. سول ءۇشىن ەسكى پاروۆوز بەن ۆاگوندار «قازاقستان تەمىر جولى» كومپانياسى ارقاسىندا وسى جەرگە جەتكىزىلدى. ءتۇسىرۋ جۇمىستارىنا كۇن سايىن 50 دەن استام ادام (ماسسوۆكا) قاتىستى»، - دەدى فيلمنىڭ پروديۋسەرى ولجاباي مۇسابەكوۆ رەجيسسەر تاماش توت كارتينا سەناريىن وزگەرتۋگە تۋرا كەلگەنى تۋرالى ايتىپ ءوتتى.

«باسىندا فيلمدى قىس مەزگىلىندە تۇسىرەمىز دەپ جوسپارلاعان بولاتىنبىز. ۋاقىتتىڭ تىعىزدىعىنان سەناريدى ءسال وزگەرتىپ، قازان ايىندا تۇسىرىلىمدەردى باستاپ كەتۋگە ءماجبۇر بولدىق. نەگىزگى تۇسىرىلمدەر الماتى وبلىسى كەگەن اۋدانى جالاڭاش اۋىلىنىڭ ماڭىندا ءوتتى. تاجىريبەلى جانە كاسىبي كوماندامىزدىڭ ارقاسىندا تۇسىرىلىمدەردى ۋاقىتىلى اياقتادىق»، - دەدى رەجيسسەر تاماش توت.

سونىمەن قاتار رەجيسسەر باستى رولگە ۆەنگريانىڭ تەاتر جانە كينو اكتەرى پەتەر بارناي (Péter Blrnai) شاقىرىلعانىن ءمالىم ەتتى. ودان بولەك، فيلمگە الدابەك شالبايەۆ، ەرجان نۇرىمبەت سىندى باسقا دا وتاندىق اكتەرلەر تۇسكەن.

- «فيلمگە تۇسكەن اكتەرلەرىمىز وتە مىقتى. بۇل جوباعا تالانتتى اكتەرلەر جينالدى. مىسالى، ۆەنگريادان جاس اكتەر پەتەر بارنايدى ارنايى شاقىرتتىق. وسى ۋاقىت ارالىعىندا ول ۇلكەن جۇمىس اتقاردى. بۇل وعان ۇلكەن مەكتەپ بولدى. ورىس جانە قازاق تىلدەرىندە سويلەمەسە دە، ديالوگتاردى جاتقا ايتىپ، تۇسىرىلىمدەر كەزىندە ەش قينالمادى. قازاقستاندىق اكتەرلەر وعان ۇلكەن كومەك كورسەتتى»، - دەدى رەجيسسەر.

سونداي-اق «ءولى ارا» فيلمىنىڭ ءتۇسىرۋ توبى وسى كارتينانىڭ تۇسىرىلىمدەرىنە قاتىسقان Nomad Stunts كاسكادەرلەر توبىنا العىسىن ءبىلدىردى.

پروديۋسەردىڭ ايتۋىنا قاراعاندا، بارلىعى 35 ت ب ماتەريال تۇسىرىلگەن. فيلمنىڭ مونتاجداۋ جۇمىستارى بۋداپەشت قالاسىنداعى بەلگىلى FOCUSFOX كومپانياسىندا جۇرگىزىلەدى.

كەيىن «قازاق فيلم» كينوستۋدياسىندا تۋىندىنىڭ ورىس تىلىندەگى نۇسقاسى دايىندالادى.

«ءولى ارا» تاريحي تۋىندىنىڭ تسەناري اۆتورى - نۇرلان سانجار، قويۋشى رەجيسسەر - تاماش توت، قويۋشى وپەراتور - الەكسەي كيريۋحين، قويۋشى سۋرەتشى - رۋستام ودينايەۆ، گريم بويىنشا سۋرەتشى - ليديا وردىنسكايا، پروديۋسەرى - ولجاباي مۇسابەكوۆ.